دۇنيەجۇزى قازاقتارى قاۋىمداستىعى ۇلكەن داۋدىڭ تابالدىرىعىندا تۇرعان سەكىلدى. كۇنى كەشە عانا بوتاگوز ۋاتقان ەسىمدى الەۋمەتتىك جەلى پايدالانۋشىسى قاۋىمداستىقتىڭ الماتىدان استاناعا كوشۋىنە بايلانىستى، ۇيىمنىڭ جاڭا باسشىلىعى تاراپىنان ورىس تىلىندە ەسكەرتۋ حات العانىن جازىپتى. حاتتىڭ ۇزىن-ىرعاسى تومەندەگىدەي.





«23 جىل بويى دۇنيەجۇزى قازاقتارى قاۋىمداستىعىندا ەڭبەك ەتتىم. قىرىققا جۋىق ەلدەردە تۇراتىن قازاق دياسپوراسىنىڭ مىڭداعان وكىلدەرىمەن تانىسىپ، ءبىراز ەلدەردى ارالاپ كوردىم.

ەڭبەگىم دە باعالاندى. مارقۇم قالەكەڭنىڭ، تالعات اسىل ۇلىنىڭ كوپتەگەن جاقسىلىقتارىن كوردىم، اعالارىما العىسىم شەكسىز! ارمانىم جوق. قاۋىمداستىقتىڭ الماتىدان استانا قالاسىنا كوشۋىنە وراي ول جاققا بارۋدان باس تارتتىم. مەن عانا ەمەس، قاۋىمداستىقتىڭ 98 پايىز قىزمەتكەرلەرى سولاي جاسادى.

قاۋىمداستىقتىڭ بۇگىنگى باسشىلىعىنان ورىس تىلىندەگى جىبەرگەن ۋۆەدوملەنيەسىنە زاڭ بويىنشا ورىسشا جاۋاپ بەردىك.

شەتەلدەگى اعايىندار مەن ەلگە ورالىپ جاتقان قانداستارىمىزعا ءالى دە بولسا تەگىن اقىل كەڭەس بەرۋگە ءازىرمىن. بارلىق قازاق مەنىڭ جالعىزىم!

ۇلتىمىزدىڭ بىرلىگى، جەرىمىزدىڭ ساتىلماۋى، جالعا بەرىلمەۋىمەن ءتىلىمىز ءۇشىن ەڭبەكتەنەمىن!»، – دەيدى بوتاگوز ۋاتقان.

ءيا، قاۋىمداستىقتىڭ ءبىراز جۇمىس اتقارعانىن بىلەمىز. ءبىراق سوڭعى كەزدەرى قاۋىمداستىقتىڭ ەكس-توراعاسى تالعات ماماشيەۆتىڭ بىرنەشە ورالمانمەن ءجۇز شايىسىپ، داۋلاسقانىن دا بىلەمىز. سوڭعى ۋاقىتتارى قاۋىمداستىق شەتەلدەگى قازاقتاردىڭ مۇددەسىن قورعاۋدا ءالجۋازدىق تانىتقانى جاسىرىن ەمەس. شەتەلدى قويىپ، ەلگە كەلگەن ورالمانداردىڭ مۇددەسىن قوعاۋدا قاۋىمداستىق قاۋقارسىزدىق تانىتتى.

سوندىقتان بوتاگوز ۋاتقان ايتقانداي، تالعات ماماشيەۆ كەزىندە قاۋىمداستىق ءتيىمدى جۇمىس ىستەدى دەپ ايتا المايمىز.

قاۋىمداستىقتىڭ جۇمىسىنىڭ قوجىراۋى تالعات ماماشيەۆتىڭ قوعامدىق ورتادا ساياسي سالماعىنىڭ كەمۋى، بيلىككە باتىل تالاپ قويا الماۋى سەبەپ بولعانى جاسىرىن ەمەس.

ال قاۋىمداستىق باسشىسى بولىپ جاڭادان تاعايىندالعان زاۋىتبەك تۇرىسبەكوۆتىڭ ەلىمىزدىڭ قوعامدىق-ساياسي ومىرىندە اجەپتاۋىر بەدەلى بار ازامات ەكەنىن بىلەمىز. بۇعان دەيىن مينيستر، اكىم، ەلشى بولىپ، ۇلكەن لاۋازىمدى قىزمەتتەردى اتقارعان زاۋىتبەك تۇرىسبەكوۆ وسى قىزمەتكە قىزىعۋشىلىق تانىتىپ، ىقىلاسىن سالىپ جۇمىس ىستەسە، ءبىراز ماسەلەنى شەشەتىندەي ساياسي سالماعى بار.

ءبىراق قاۋىمداستىقتىڭ قىزمەتكەرلەرىنە ورىس تىلىندە حات جىبەرگەنىن قازاقى ورتا قولدامايدى. ارينە، بۇل ۇلكەن قاتەلىك. تازا قازاقتىڭ ماسەلەسىمەن اينالىساتىن ۇيىمنىڭ جۇمىسىندا قاي ۋاقىتتا بولسا دا قازاق ءتىلى ۇستەم تۇرۋى كەرەك. سوندىقتان مۇنى تۇرىسبەكوۆتىڭ قول استىنداعى قىزمەتكەرلەردىڭ جىبەرگەن قاتەلىگى دەپ قابىلدايمىز. ولاي دەپ بايلام جاسايىق دەسەك، حاتتىڭ سوڭىندا زاۋىتبەك تۇرىسبەكوۆتىڭ قولى تۇر.

ەگەر بۇل جاعدايدى دەر كەزىندە تۇزەمەسە، زاۋىتبەك مىرزانىڭ باسى ءبىراز داۋعا قالۋ مۇمكىن.

نۇرلان جۇماحان