Astanada 2022 jyly Aqorda aldynda miting uiymdastyrǵan Marat Ábievke qatysty taǵy bir sot úkimi shyǵaryldy, dep habarlaidy Dalanews.kz.
Qarjy monitoringi agenttiginiń málimetinshe, 2025 jyly 14 aqpanda Astana qalasynyń mamandandyrylǵan aýdanaralyq sotynyń úkimimen "Bolashaq sáýletshileri" qorynyń negizin qalaýshy Marat Ábiev pen onyń sybailastary sottaldy.
Marat Ábiev uiymdasqan topty qurý jáne basqarý, sondai-aq oǵan qatysý, munai men munai ónimderin zańsyz satyp alý, satý, saqtaý jáne tasymaldaý, sondai-aq olardyń zańdylyǵyn rastaityn qujattarsyz óńdeý,ekonomikalyq kontrabanda baptary boiynsha 9 jylǵa bas bostandyǵynan aiyryldy.
Sondai-aq onyń memlekettik qyzmette ómir boiyna laýazymdardy atqarýyna, qoǵamdyq birlestikterdi qurýǵa jáne basshylyqqa alýǵa bailanysty qyzmetpen 5 jyl merzimge ainalysýyna tyiym salyndy.
Onyń sybailastary - Anton Novitskii, Janibek Daribaev, Evgenii Grebnev, Amanai Mahmetov 8 jylǵa bas bostandyǵynan aiyryldy. Sot sheshimi boiynsha aiyptalýshylardyń múlki tárkilenip, olardyń kontrabandalyq jolmen alynǵan 6 mlrd teńgeden astam qylmystyq tabysy tárkilendi.
Sot úkimi áli zańdy kúshine engen joq.
Aita ketsek, 2018-2022 jyldar aralyǵynda atalǵan tulǵalar uiymdasqan top quryp, Aqtóbe oblysyndaǵy MÓZ-da EAEO aýmaǵynda kólemi 50,6 myń tonna bolatyn satýǵa tyiym salynǵan "K-2" ekologiialyq klasty dizel otynyn óndirgen.
"Keiin bul dizel otyny basqa munai ónimi retinde 11,3 mlrd teńgege satyldy, sonyń ishinde 22,6 myń tonnasy 6,7 milliard teńgege shetelge kontrabandalyq jolmen shyǵaryldy. Naqtylai ketsek, munai ónimderiniń zańsyz ainalymynan túsken qylmystyq tabys arqyly "Genesis" (nemese "Bolashaq sáýletshileri") atty zańsyz qoǵamdyq birlestiktiń qyzmeti qarjylandyrylǵan", dep málimdegen sol kezde QMA.
Zańsyz qoǵamdyq birlesik quryp, ony basqarǵany úshin 2023 jyldyń 21 tamyzynda Marat Ábiev 7 jylǵa sottalǵan bolatyn. Er adam bir top adammen birge Aqorda aldyna jinalyp, óziniń jobasyn maquldaýdy talap etken.
