Mánerlep syrǵanaýdan Olimpiada chempiony Mihail Shaidorov sport salasyndaǵy sheneýnikterdiń tólemder men kelisimshartqa qatysty pikirlerine jaýap berdi. Sportshy óz esiminiń negizsiz daýǵa aralasqanyn qalamaitynyn aitty, dep habarlaidy dalanews.kz.
Shaidorov aldymen ózine qoldaý bildirgen qazaqstandyqtarǵa alǵys aityp, memlekettik organdarmen ashyq tartysqa túskisi kelmeitinin, alaida óziniń atyna aitylǵan pikirlerge únsiz qala almaitynyn jetkizdi.
«Eńbek sińirgen sport sheberi» kýáligin áli almaǵan
Sportshynyń sózinshe, ol 2025 jyly álem chempionatynda kúmis júlde alǵannan keiin «eńbek sińirgen sport sheberi» normativin oryndaǵanymen, osy kúnge deiin tiisti kýáligin almaǵan.
– Túsinikteme bergim keledi. Iá, búgingi kúnge deiin maǵan eńbek sińirgen sport sheberi kýáligi tabystalǵan joq. Men barlyq rásimderden óttim, biraq qujatty almadym. Maǵan qyzyl kilem tóselgen saltanatty rásim kerek emes, ony poshta arqyly konvertpen jiberse de alar edim. Bul kýálik – meniń on jyldyq eńbegimniń nátijesi, jetistigim men muram, – dep jazdy Shaidorov Threads paraqshasynda.
Olimpiada syiaqysyna qatysty shaǵymy joq
Shaidorov Olimpiada oiyndary úshin beriletin syiaqylardyń keshigýine qatysty narazylyǵy joǵyn aitty. Onyń sózinshe, mundai rásimder ýaqyt alady jáne tiisti jumystar júrgizilip jatqanyna senimdi.
Ómir boiǵy tólem týraly: «Bul aqparat tolyq durys emes»
Sportshy ministrlik jaýabynda ómir boiy tólenetin tólemder týraly aitylǵan málimetterde sáikessizdik baryn jetkizdi.
– Ministrlik jaýap berýge asyqqan siiaqty, sebebi bul aqparat tolyq durys emes. Men bul tólemderdi tek 20 jyl eńbek ótili bolǵan jaǵdaida ǵana ala alamyn. Qazir men nebári 21 jastamyn. Sondyqtan qazir bul tólemderge úmit artyp otyrǵan joqpyn. Bolashaqta ondai eńbek ótilin jinaqtaýym múmkin, biraq ázirge bul týraly aitý erte. Alda áli kóp jumys bar, – dedi ol.
Kelisimsharttaǵy basty daý – 2030 jylǵy Olimpiada týraly talap
Shaidorov jańa kelisimshartqa qatysty da pikir bildirip, komandasy tek bir tarmaqty qaita qaraýdy suraǵanyn aitty. Onyń sózinshe, qujatta 2030 jylǵy Olimpiadada mindetti túrde jeńiske jetý týraly talap kórsetilgen.
– Biz komandamen birge zańdyq turǵydan osy tarmaqty qaita qaraýdy ǵana suradyq. Óitkeni bul qisynsyz ári múmkin emes talap. Men 2026 jyly tek tórt jyldan keiin ótetin Olimpiadany uta almaimyn ǵoi. Biz zańgerlerge suraq joldadyq, tarmaqty qaita qaraýdy ótindik. Biraq búginge deiin bizben eshkim bailanysqa shyqqan joq. Buqaralyq aqparat quraldarynda aitylyp jatqandai jaǵdai bolǵan joq, – dedi chempion.
Bes ailyq jalaqysyn qaiyrymdylyqqa aýdarmaq
Mánerlep syrǵanaýshy sóz sońynda sport sheneýnikteri barlyq qaryzdaryn jaýyp, bes aidan beri keshiktirilgen jalaqysyn tolyq tólegen jaǵdaida, bul qarajatty túgeldei qaiyrymdylyqqa jumsaitynyn málimdedi.
– Maǵan tiesili barlyq tólemder berilgen soń, bul qarajattyń barlyǵyn Balalardy qorǵaý kúnine orai muqtaj balalarǵa kómek kórsetýge aýdaramyn, – dedi Shaidorov.
