Zaisan aýdanyndaǵy halyqaralyq áýejai qurylysy belgilengen kestege sai jalǵasýda. Qazirgi ýaqytta nysannyń 75 paiyzdan astamy aiaqtalǵan. Qurylys alańynda 310 jumysshy eki aýysymmen eńbek etip, 75 arnaiy tehnika jumyldyrylǵan, dep habarlaidy dalanews.kz.
Óńir úshin strategiialyq mańyzy joǵary jobanyń qurylys barysymen tanysqan ShQO ákimi Nurymbet Saqtaǵanov merdigerlerge jumystyń sapasy men merzimine qatysty talaptyń qatań ekenin kezekti ret eskertti. Bul – tek oblys úshin emes, el kólemindegi mańyzdy infraqurylymdyq nysandardyń biri.
– Sapa jáne taǵy da sapa. Bul kezekti qurylys nysany emes. Oblysty aitpaǵanda, elimiz úshin de airyqsha mańyzǵa ie áýejai. Sondyqtan jumys josparlanǵan merzimnen keshikpeýi tiis. Qandai qosymsha suraqtar bolsa aityńyzdar. Óitkeni, nysan úshin birinshi kezekte jaýapkershilik sizderden suralatyn bolady. Áýejai qurylysy kestege sai aiaqtalýy úshin barlyq múmkindikter jasalýda, - dedi aimaq basshysy.
Merdiger uiym – «ELHON» JShS málimetinshe, qazirgi tańda áýejaidyń negizgi infraqurylymdyq bólikteri tolyq aiaqtalǵan.
– Jalpy atqarylǵan jumystarǵa toqtalsaq, ushyp-qoný jolaǵy tolyq aiaqtaldy. Perron men rýlej joldary da júz paiyz daiyn. Barlyq injenerlik-kommýnikatsiialyq jeliler júrgizildi. Qazir tórtinshi kezeń boiynsha jumys atqarylyp jatyr. Bul kezeńde terminal, avariialyq-qutqarý qyzmeti jáne ózge de nysandardyń qurylysy qamtylǵan, – dedi «ELHON» JShS direktory Janbolat Qazanov.
Joba aiasynda áýejai aýmaǵynda jalpy 11 ǵimarat salý kózdelgen. Qazirgi ýaqytta barlyq nysanda qurylys jumystarynyń qarqyny joǵary. Sonymen qatar, abattandyrý da qatar júrgizilýde.
Oblys ákimi qurylys sapasyna qoiylatyn talaptyń ár kezeńde qatań baqylaýda bolatynyn atap ótti. Áýejaidyń ýaqtyly ári talapqa sai paidalanýǵa berilýi – halyq aldyndaǵy jaýapkershilik pen óńirdiń kólik-logistikalyq áleýetin arttyrýdaǵy mańyzdy mindetterdiń biri.
Óz kezeginde merdiger kompaniia basshysy qurylys jumystaryna kedergi keltiretin másele joq ekenin jetkizdi.
– Jumystar josparǵa sáikes júrgizilýde. Qurylys materialdary jetkilikti. Áýejaiǵa ornatylatyn jabdyqtar tolyq satyp alynyp, daiyn tur. Aldyn ala jospar boiynsha, biyl 12 shildeden bastap synaq retinde alǵashqy ushýlardy bastaýdy kózdep otyrmyz, – dedi Janbolat Qazanov.
