Sheteldik kompaniia Jetisý jerinde qýaty 500 MVt bolatyn kún elektr stansasynyń qurylysy jobasyn júzege asyrýǵa nietti.
Jetisý oblysy ákiminiń orynbasary Áset Qanaǵatov "El-Mor electric installation & Services (1986) Ltd" kompaniiasynyń prezidenti Gershon Gai myrza bastaǵan kompaniia ókilderimen irgeli jobaǵa qatysty máselelerdi talqylady.
Aldymen óńirdiń investitsiialyq múmkindikterine qysqasha toqtalyp, Jetisý óńiriniń jasyl energiiany damytýdaǵy áleýetiniń mol ekenin atap ótken Áset Qanaǵatov sheteldik kompaniianyń usynyp otyrǵan investitsiialyq jobasyna jergilikti ákimdik barynsha qoldaý kórsetetin aitty.
Izraildik kompaniia jańartylǵan energiia kózderi salasynda qýaty 500 MVt bolatyn «Jetisý oblysy aýmaǵyndaǵy kún fotoelektrlik elektr stantsiiasy kesheniniń qurylysy» jobasyn otandyq «Sunstar Energy» JShS-men birlesip qolǵa alýǵa ynta bildirip otyr.
Kompaniianyń investitsiialar jónindegi direktory David Golodtyń aitýynsha, jobaǵa shamamen 400 mln dollar kóleminde investitsiia salynady.
Áset Qanaǵatovtyń aitýynsha, aldaǵy ýaqytta qurylysqa qajetti jer ýchaskesi aiqyndalyp, jumys toby qurylyp, jobany iske asyrýdyń naqty sharalary men merzimderi belgilenetin bolady.
Kezdesý sońynda oblys ákimdigi, «El-Mor electric installation & Services (1986) Ltd» kompaniiasy jáne «Sunstar Energy» JShS arasynda atalǵan jobany júzege asyrý nieti týraly úsh jaqty memorandýmǵa qol qoiyldy.
