شەتەلدىك كومپانيا جەتىسۋ جەرىندە قۋاتى 500 مۆت بولاتىن كۇن ەلەكتر ستانساسىنىڭ قۇرىلىسى جوباسىن جۇزەگە اسىرۋعا نيەتتى.
جەتىسۋ وبلىسى اكىمىنىڭ ورىنباسارى اسەت قاناعاتوۆ "El-Mor electric installation & Services (1986) Ltd" كومپانياسىنىڭ پرەزيدەنتى گەرشون گاي مىرزا باستاعان كومپانيا وكىلدەرىمەن ىرگەلى جوباعا قاتىستى ماسەلەلەردى تالقىلادى.
الدىمەن ءوڭىردىڭ ينۆەستيسيالىق مۇمكىندىكتەرىنە قىسقاشا توقتالىپ، جەتىسۋ ءوڭىرىنىڭ جاسىل ەنەرگيانى دامىتۋداعى الەۋەتىنىڭ مول ەكەنىن اتاپ وتكەن اسەت قاناعاتوۆ شەتەلدىك كومپانيانىڭ ۇسىنىپ وتىرعان ينۆەستيسيالىق جوباسىنا جەرگىلىكتى اكىمدىك بارىنشا قولداۋ كورسەتەتىن ايتتى.
يزرايلدىك كومپانيا جاڭارتىلعان ەنەرگيا كوزدەرى سالاسىندا قۋاتى 500 مۆت بولاتىن «جەتىسۋ وبلىسى اۋماعىنداعى كۇن فوتوەلەكترلىك ەلەكتر ستانسياسى كەشەنىنىڭ قۇرىلىسى» جوباسىن وتاندىق «Sunstar Energy» جشس-مەن بىرلەسىپ قولعا الۋعا ىنتا ءبىلدىرىپ وتىر.
كومپانيانىڭ ينۆەستيسيالار جونىندەگى ديرەكتورى داۆيد گولودتىڭ ايتۋىنشا، جوباعا شامامەن 400 ملن دوللار كولەمىندە ينۆەستيسيا سالىنادى.
اسەت قاناعاتوۆتىڭ ايتۋىنشا، الداعى ۋاقىتتا قۇرىلىسقا قاجەتتى جەر ۋچاسكەسى ايقىندالىپ، جۇمىس توبى قۇرىلىپ، جوبانى ىسكە اسىرۋدىڭ ناقتى شارالارى مەن مەرزىمدەرى بەلگىلەنەتىن بولادى.
كەزدەسۋ سوڭىندا وبلىس اكىمدىگى، «El-Mor electric installation & Services (1986) Ltd» كومپانياسى جانە «Sunstar Energy» ج ش س اراسىندا اتالعان جوبانى جۇزەگە اسىرۋ نيەتى تۋرالى ءۇش جاقتى مەموراندۋمعا قول قويىلدى.
