Memleket basshysy Qasym-Jomart Toqaevtyń quqyq pen zań ústemdigi týraly bastamalary aiasynda Májilis depýtaty Erlan Saiyrov elimizdegi infliýenserler men koýchterdiń zańsyz áreketterine nazar aýdardy. Ol Qazaqstan Respýblikasy Premer-Ministriniń orynbasary Serik Jumanǵaringe áleýmettik jelilerdegi zańsyz lotereialar men salyq máselesine qatysty usynystaryn joldady, dep habarlaidy Dalanews.kz.
Depýtattyń aitýynsha, sońǵy ýaqytta koých-infliýenserler áleýmettik jelilerde zańsyz onlain-lotereialardy jii uiymdastyryp keledi. Olar túrli baǵaly syilyqtar – turmystyq tehnika, zergerlik buiymdar, qymbat avtokólikter men jyljymaityn múlikterdi oinatyp, halyqty aldaý shemalaryn qoldanyp júr. Mundai áreketter zańsyz sanalady, degenmen olar "giv" formatynda keń taralǵan.
“Ótken jyly osyndai zańsyz lotereialar men baǵaly syilyqtardy oinatýdyń 106 faktisi anyqtaldy. Quqyqbuzýshylarǵa 46 million teńgeden astam aiyppul salyndy. Soǵan qaramastan, áleýmettik jelilerde mundai zańsyz áreketter toqtamai otyr,” – dedi Erlan Saiyrov.
Onyń aitýynsha, máseleniń ekinshi jaǵy da bar – Qazaqstanda jańa býyn kóshbasshylary qalyptasyp keledi. Olardyń áleýmettik jelidegi paraqshalary aqyly kýrstar, jarnamalar jáne túrli kommertsiialyq usynystarǵa toly. Alaida kóptegen infliýenser óz tabysynan salyq tóleýge asyqpaidy.
“AQSh, Ulybritaniia, Qytai siiaqty damyǵan elderde kontent jasaýshylar tabysynan mindetti túrde salyq tóleidi. Keibir memleketterde bul mólsher 40%-ǵa deiin jetýi múmkin. Qazaqstandyq infliýenserler – qoǵamnyń bilimdi bóligi. Olar óz bedeli men talantynyń arqasynda ózgelerge úlgi bolýy tiis jáne qarjylai jaýapkershilikke atsalysqany jón,” – dep atap ótti depýtat.
Ol bul baǵyttaǵy jumystardy kúsheitý qajettigin aityp, tómendegidei naqty sharalardy usyndy:
1. Infliýenserler arasynda zań normalaryn saqtaý jóninde túsindirý jumystaryn júrgizý.
2. Olardyń tabysyn kásipkerlik qyzmetke jatqyzýdyń naqty talaptaryn ázirleý, zań normalaryn túrlishe túsindirý men sýbektivti baǵalaýdan aýlaq bolý.
3. Áleýmettik jelilerde zańsyz utys oiyndaryn ótkizýge jol bermeý maqsatynda baqylaýdy kúsheitý.
Saiyrovtyń pikirinshe, “Onlain platformalar týraly” zańǵa sáikes, tabys tabatyn infliýenserler kásipker retinde tirkelip, jarnamalaryn ashyq kórsetýi tiis.
“Biz áleýmettik jelilerde kásibi blogerlerdiń salyq organdarynyń málimdemesine túsinistikpen qaraǵanyn baiqadyq. Bul – qýantarlyq jait! Endi másele qarjylai jaýapkershiliktiń jańa qundylyqtaryn qalyptastyrýda,” – dedi ol.
Depýtat bul bastamalardyń zań ústemdigi men salyq mádenietin nyǵaitýǵa oń áser etetinine senim bildirdi.
