مەملەكەت باسشىسى قاسىم-جومارت توقايەۆتىڭ قۇقىق پەن زاڭ ۇستەمدىگى تۋرالى باستامالارى اياسىندا ءماجىلىس دەپۋتاتى ەرلان سايىروۆ ەلىمىزدەگى ينفليۋەنسەرلەر مەن كوۋچتەردىڭ زاڭسىز ارەكەتتەرىنە نازار اۋداردى. ول قازاقستان رەسپۋبليكاسى پرەمەر-مينيسترىنىڭ ورىنباسارى سەرىك جۇمانعارينگە الەۋمەتتىك جەلىلەردەگى زاڭسىز لوتەرەيالار مەن سالىق ماسەلەسىنە قاتىستى ۇسىنىستارىن جولدادى، دەپ حابارلايدى Dalanews.kz.
دەپۋتاتتىڭ ايتۋىنشا، سوڭعى ۋاقىتتا كوۋچ-ينفليۋەنسەرلەر الەۋمەتتىك جەلىلەردە زاڭسىز ونلاين-لوتەرەيالاردى ءجيى ۇيىمداستىرىپ كەلەدى. ولار ءتۇرلى باعالى سىيلىقتار – تۇرمىستىق تەحنيكا، زەرگەرلىك بۇيىمدار، قىمبات اۆتوكولىكتەر مەن جىلجىمايتىن مۇلىكتەردى ويناتىپ، حالىقتى الداۋ سحەمالارىن قولدانىپ ءجۇر. مۇنداي ارەكەتتەر زاڭسىز سانالادى، دەگەنمەن ولار "گيۆ" فورماتىندا كەڭ تارالعان.
“وتكەن جىلى وسىنداي زاڭسىز لوتەرەيالار مەن باعالى سىيلىقتاردى ويناتۋدىڭ 106 فاكتىسى انىقتالدى. قۇقىقبۇزۋشىلارعا 46 ميلليون تەڭگەدەن استام ايىپپۇل سالىندى. سوعان قاراماستان، الەۋمەتتىك جەلىلەردە مۇنداي زاڭسىز ارەكەتتەر توقتاماي وتىر،” – دەدى ەرلان سايىروۆ.
ونىڭ ايتۋىنشا، ماسەلەنىڭ ەكىنشى جاعى دا بار – قازاقستاندا جاڭا بۋىن كوشباسشىلارى قالىپتاسىپ كەلەدى. ولاردىڭ الەۋمەتتىك جەلىدەگى پاراقشالارى اقىلى كۋرستار، جارنامالار جانە ءتۇرلى كوممەرسيالىق ۇسىنىستارعا تولى. الايدا كوپتەگەن ينفليۋەنسەر ءوز تابىسىنان سالىق تولەۋگە اسىقپايدى.
“اقش، ۇلىبريتانيا، جۇڭگو سياقتى دامىعان ەلدەردە كونتەنت جاساۋشىلار تابىسىنان مىندەتتى تۇردە سالىق تولەيدى. كەيبىر مەملەكەتتەردە بۇل مولشەر 40%-عا دەيىن جەتۋى مۇمكىن. قازاقستاندىق ينفليۋەنسەرلەر – قوعامنىڭ ءبىلىمدى بولىگى. ولار ءوز بەدەلى مەن تالانتىنىڭ ارقاسىندا وزگەلەرگە ۇلگى بولۋى ءتيىس جانە قارجىلاي جاۋاپكەرشىلىككە اتسالىسقانى ءجون،” – دەپ اتاپ ءوتتى دەپۋتات.
ول بۇل باعىتتاعى جۇمىستاردى كۇشەيتۋ قاجەتتىگىن ايتىپ، تومەندەگىدەي ناقتى شارالاردى ۇسىندى:
1. ينفليۋەنسەرلەر اراسىندا زاڭ نورمالارىن ساقتاۋ جونىندە ءتۇسىندىرۋ جۇمىستارىن جۇرگىزۋ.
2. ولاردىڭ تابىسىن كاسىپكەرلىك قىزمەتكە جاتقىزۋدىڭ ناقتى تالاپتارىن ازىرلەۋ، زاڭ نورمالارىن تۇرلىشە ءتۇسىندىرۋ مەن سۋبەكتيۆتى باعالاۋدان اۋلاق بولۋ.
3. الەۋمەتتىك جەلىلەردە زاڭسىز ۇتىس ويىندارىن وتكىزۋگە جول بەرمەۋ ماقساتىندا باقىلاۋدى كۇشەيتۋ.
سايىروۆتىڭ پىكىرىنشە، “ونلاين پلاتفورمالار تۋرالى” زاڭعا سايكەس، تابىس تاباتىن ينفليۋەنسەرلەر كاسىپكەر رەتىندە تىركەلىپ، جارنامالارىن اشىق كورسەتۋى ءتيىس.
“ءبىز الەۋمەتتىك جەلىلەردە كاسىبي بلوگەرلەردىڭ سالىق ورگاندارىنىڭ مالىمدەمەسىنە تۇسىنىستىكپەن قاراعانىن بايقادىق. بۇل – قۋانتارلىق جايت! ەندى ماسەلە قارجىلاي جاۋاپكەرشىلىكتىڭ جاڭا قۇندىلىقتارىن قالىپتاستىرۋدا،” – دەدى ول.
دەپۋتات بۇل باستامالاردىڭ زاڭ ۇستەمدىگى مەن سالىق مادەنيەتىن نىعايتۋعا وڭ اسەر ەتەتىنىنە سەنىم ءبىلدىردى.
