Indoneziianyń Bali aralynda qazaqstandyq model Gúlsezim Altaibekova ustaldy. Ol túngi klýbtardyń birinde reseilik blogerge shabýyl jasady degen kúdikke ilingen. Bul týraly Dalanews.kz KTK telearnasyna silteme jasap habarlaidy.
Oqiǵa eki qyzdyń bir mekemede demalyp otyrǵan kezinde bolǵan. Jábirlenýshiniń aitýynsha, ol kútpegen jerden qatty soqqy alyp, esinen tanyp qalǵan.
“Biz úsh qyz bolyp otyrdyq. Al úlken ústelde er adamdar men bir qyz boldy. Olarmen esh bailanys bolǵan joq. Shyǵýǵa bet alǵan sátte kenetten qatty soqqy tiip, esimnen tanyp qaldym da, jerge quladym. Keiin basyma aýyr zat - áinek bótelke nemese ústel shamy tigenin aitty. Qazir basym qatty aýyrady, oń qulaǵym estimei qaldy. Men bul soqqy maǵan arnalmaǵanyna senimdimin. Alaida dál osy jaǵdaidyń qurbany men boldym”, — deidi bloger.
Qazirgi ýaqytta jábirlenýshi jergilikti klinikada em qabyldap jatyr. Al túngi klýb ákimshiligi blogerdiń nusqasyn joqqa shyǵaryp, janjalǵa blogerdiń qurbylary sebep bolǵanyn, sodan keiin qyzdar arasynda sózge kelý oryn alǵanyn málimdedi.
Sonymen qatar keibir áleýmettik jeliler men beiresmi derekkózderde janjaldyń ýkrainalyq áýendi qoiýǵa bailanysty týyndaǵany habarlandy. Alaida bul málimetti resmi organdar ázirge rastaǵan joq.
Gúlsezim Altaibekova 60 táýlikke qamaýǵa alynyp, araldan shyǵýyna tyiym salyndy.
Qazaqstan Respýblikasynyń Syrtqy ister ministrligi bul jaǵdaiǵa qatysty pikir bildirdi.
“Istiń mán-jaiy men ózge de qylmystyq-protsestik aqparat jariia etýge jatpaidy. Protsestik mártebe men qoldanylatyn sharalar Indoneziianyń ulttyq zańnamasyna sáikes tek quzyrly organdarmen aiqyndalady”, — dep habarlady.
Sonymen qatar Qazaqstannyń Indoneziiadaǵy elshiligi azamatshaǵa óz quzyreti sheńberinde barlyq qajetti konsýldyq-quqyqtyq kómekti kórsetip otyrǵanyn málimdedi.
