Halyqaralyq valiýta qory (HVQ) qańtar aiyna arnalǵan esebin jariialady. Oǵan sáikes, 2025 jáne 2026 jyldary álemdik ekonomika ósimi boljanady. Sonyń ishinde Qazaqstannyń da, dep jazady Dalanews.kz.
HVQ esebine sáikes, jahandyq ósim 2024 jyly 3,2% bolsa, al 2025 jyly bul kórsetkish 3,3%-dy qurap, 0,1 tarmaqqa kóteriledi dep boljanady.
Damyǵan elderde 2025 jyly ósim 0,1 tarmaq qosyp, 1,6% bolatyny bajailanady. HVQ 2024 jylǵy AQSh ekonomikasynyń ósimin qaita qarastyryp, 2,7% bolatynyn naqtylaidy, bul - qazan aiyndaǵy boljamnan 0,5 tarmaqqa joǵary. Boljamdy jaqsartý eńbek naryqtaryndaǵy belsendilikpen jáne investitsiialardyń jedeldeýimen bailanysty, biraq 2026 jyly ósimniń áleýetti deńgeige deiin baiaýlaityny kútiledi.
Qytai boiynsha HVQ qarasha aiynda jariialanǵan biýdjettik sharalar jiyntyǵyna bailanysty 2025 jylǵa arnalǵan boljamyn qazan aiynda boljanǵan 4,5%-dan 4,6%-ǵa deiin azdap jaqsartty, bul saýda saiasaty men jyljymaityn múlik naryǵyndaǵy máselelerge qatysty dúdamaldylyqtyń joǵarylaýynan týyndaǵan investitsiialarǵa teris áserdi aitarlyqtai óteidi. Alaida, ol Kompartiianyń 5,0% targetinen, árine alshaq jatyr.
Kerisinshe, Úndistan boiynsha 2025 jáne 2026 jyldary HVQ qazan aiynda boljaǵan áleýetke sáikes 6,5% deńgeiindegi senimdi ósimdi saqtap qaldy.
Aqyry, Qazaqstan boiynsha HVQ 2025 jylǵy ekonomikalyq ósimin qazan aiyndaǵy boljamda kórsetilgen 4,6%-dan 5,5%-ǵa, rekordtyq deńgeige deiin jaqsartty. Bul, eń aldymen, Teńiz kenishindegi "Bolashaq keńeiý jobasy" esebinen munai óndirisi kóleminiń artýymen bailanysty. Sonymen qatar, 2026 jylǵy boljamdaǵy kórsetkish 2025 jyldaǵydan birden 1,4 tarmaqqa tómendeidi dep kútiledi.
Aitqandai, 2024 jylǵy boljamdy ósim 3,5%-dan 4,0%-ǵa deiin jaqsardy, degenmen naqtysynda bul rettegi ósim joǵaryraq bolatyny qazirdiń ózinde túsinikti.
