Tanymal advokat Djohar Ótebekov Sherzat isindegi shikilikterdi jaiyp saldy, dep habarlaidy Dalanews.kz.
Ótebekov Sherzat mert bolǵan oqiǵa ornynda 15 adam bolǵanyn atap ótti.
"Onyń 13-i tergeýden ótti. 11-in qamaýǵa aldy. Sot aldynda tek toǵyzy jaýap berip jatyr. Al Sherzatty óltirdi dep tek bir adam kúdikke ilingen! Qalǵany kórshilerdiń uiqysyn buzypty-mys. Olardy buzaqylyq babymen sottamaq. Biz kórgen nárse toptasyp adam óltirý bolmasa, ne bolǵany? Politsiia men prokýratýra ne úshin "hýtorlyqtardy" kinásiz dep sanaidy?
Sýdia protsesti zań turǵysynan jaqsy júrgizip otyr. Biraq sýdia óz-ózinen politseiler men prokýrorlar kinásiz dep tanyǵan adamdardy kisi óltirgeni úshin sottai almaidy", - deidi advokat.
Djohar Ótebekov buzaqylyq babymen sottalǵandar bir jyldan keiin-aq bostandyqqa shartty merzimmen shyǵyp ketetinin aitty.
"Hýtorlyqtar" taǵy zańdy ainalyp ótti! Tergeý izoliatorynda týǵan kúnin toilap, sot zalynan eki ezýi qulaǵyna jetip shyqqan solar emes pe?", - deidi Ótebekov.
Advokattyń sózinshe, prokýrorlar pyshaqtalǵan sátti kórgen birde-bir kýágerdi sotqa usynbaǵan.
"Ol jerde ondaǵan adam boldy ǵoi! Qalaisha sol kýágerlerdi usynbaǵan? Politsiia nege eshkimdi anyqtamaǵan? Pyshaqtaǵan kezdiń de videosyn tappaǵan. Bul rezonans qoi! Endi politseiler qarapaiym isterdi qalai tergeitinin elestete berińiz. Prokýratýra tergeý kezinde qaida qaraǵan? Uiat qoi!", - deidi advokat.
Sonymen qatar, Sherzat isindegi shikiliktiń biri - prokýror kúdikti Abzal Shynasyl Sherzatty pyshaqtaǵan ýaqytta durys kórsetpegen.
"Prokýrordyń sózinshe, Shynasyl Sherzatqa 00:42-ed pyshaqtap, Nurqanatty 01:04-te pyshaqtaǵan. Esteriń durys pa? Sherzat pyshaqtalyp, sosyn 20 minýt pyshaq jaraqatymen tóbelesken be? Ol dúken jaqtan qashyp, qulap túsken. Ol jerde banditter ony odan ary tópelegen. Ol sát videoǵa túsip qalǵan. Sonyń bári birneshe minýtqa sozylǵan. Eger Nurqanatty 01:04-te soqqyǵa jyqsa, Sherzatty 01:02-de urǵan", - deidi Ótebekov.
Advokat tergeýdiń jumysyna kúmán keltirgen.
"Tergeý nege "qýyp" ketken? Ár sekýndty videolar boiynsha sanaýǵa bolatyn edi ǵoi. Isti qalai bolsa solai tergegen. Olarǵa kim jol bergen? Politsiia men prokýrorlar sanai almai ma? Álde qylmyskerlerge alibi daiyndap jatyr ma? Uiat qoi! Aiyptaý aktin ózim-aq jasap bereiinshi", - deidi advokat.
Buǵan deiin Talǵardaǵy qandy tóbeleste qaza tapqan Sherzat Bolattyń ólimine bailanysty ótip jatqan sot protsesinde birqatar kýágerler jaýap berip úlgerdi.
Ekinshi kýáger retinde buǵan deiin Dana Jaqsykeldi sot aldynda túsinik bergen bolatyn. Al úshinshi kýáger Iýldash Rozybakiev sottalýshylardyń ishinen tek Abzal men Nurqiiasty tanitynyn, ózgelerin bilmeitinin málimdedi.
Sotta taǵy bir kýáger Arlan Qazykenovten jaýap alyndy. Oǵan qosa, 28 sáýirdegi oqiǵaǵa bailanysty besinshi kýáger Samat Abdyqadyr da sotqa shaqyrylyp, taraptardyń saýaldaryna jaýap berdi. Aita keteiik, Samat — sottalýshy Didar Qaliahmetovtiń týǵan baýyry.
Sot otyrysyna Didardyń taǵy bir týysy — Dáýlet Muratov ta qatysyp, jaýap berdi.
Sonymen qatar, Qarjaýbai esimdi azamatqa syra alý úshin aqsha aýdarǵan kýáger Beknur Asqarbek te sotta túsinik berdi. Sherzat qaza tapqan kúni oqiǵa ornyna kelgen politsei kúdiktiniń burynǵy synyptasy bolyp shyqty.
Memlekettik aiyptaýshy marqum Nurqanat Ǵaiypbaevtyń tergeý kezinde bergen jaýaby da sotta jariia etildi. Onda Nurqanat oqiǵa ornynda bolǵan eki qyzǵa qatysty kútpegen málimetter aitqan.
