Jekemenshik mektepterde oqýshylardyń hidjab kiiýine ruqsat berýge jol berilmeidi, mundai talapty buzǵan bilim berý uiymy litsenziiasynan aiyrylýy múmkin, dep habarlaidy dalanews.kz.
Bul týraly Oqý-aǵartý ministri Juldyz Súleimenova Úkimettegi brifingte aitty.
Ministrdiń sózinshe, Qazaqstandaǵy barlyq mektepter, onyń ishinde jekemenshik bilim berý uiymdary da biryńǵai mektep formasyna qoiylatyn talaptardy saqtaýy tiis. Sonymen qatar bilim berý júiesinde zaiyrlylyq qaǵidaty qatań saqtalýy qajet.
Súleimenova byltyr jekemenshik mektepterde oqýshylardyń dini kiim kiiýine qatysty jaǵdailar bolǵanyn aitty. Alaida biylǵy oqý jylynda mundai zańbuzýshylyq tirkelmegen.
«Biz bul máselemen jumys istep jatyrmyz, bizben birge Ulttyq qaýipsizdik komiteti de bar. Sonymen birge ákimdiktermen, jergilikti atqarýshy organdarmen birlesip jumys isteitin úlken komissiia bar», – dedi ministr.
Onyń aitýynsha, jekemenshik mektep oqýshylarǵa hidjab kiiýge ruqsat bergen jaǵdaida, bilim berý uiymynyń litsenziiasynan aiyrylýy múmkin.
Bul rette másele tek jekemenshik mektepterge ǵana qatysty emes. Qazaqstanda orta bilim berý uiymdary úshin mektep formasyna qoiylatyn talaptar belgilengen. Buǵan deiingi resmi túsindirmelerde de jekemenshik mektepter memlekettik bilim berý talaptaryn saqtaýǵa mindetti ekeni aitylǵan.
