12 jylǵa sottalǵan Hasan Qasymbaevtyń advokattary sot úkimimen kelispeı, apelásıalyq shaǵym berýdi josparlap otyr, dep habarlaıdy Dalanews.kz.

Almaty oblysynyń Talǵar aýdandyq sotynda BAQ «Hýtor» UQT jetekshisi dep ataıtyn Hasan Qasymbaevqa qatysty úkim shyǵaryldy.

Sot Hasan Qasymbaevty adam urlaý, qasaqana aýyr dene jaraqatyn salý jáne bopsalaý baptary boıynsha aıypty dep tanydy. Aıyptaýlardyń jıyntyǵy boıynsha Qasymbaev 12 jylǵa bostandyǵynan aıyryldy. Jazasyn ortasha qaýipsizdik mekemesinde óteıdi.

Úkim jarıalanǵannan keıin Hasan Qasymbaevtyń qorǵaýshylary Narıman Kervenov pen Gúlmıra Babajanova sot sheshimimen kelispeıtinderin aıtty.

«Biz úkimdi zańsyz dep sanaımyz jáne apelásıalyq shaǵym berýge nıettimiz. Hasan Qasymbaev qylmys ornynda bolmaǵan, onyń bul iske qatysy dáleldengen joq. Buǵan qosa, is materıaldarynan 18 paraq joǵalǵan. Bul prokýratýra men tergeý organdarynyń qatysýymen bolǵan, biraq sýdıa buǵan kóz juma qarap otyr», – dedi advokat Kervenov.

Olardyń pikirinshe, sot prokýrorǵa jáne is materıaldaryn qaraǵan tergeý organdaryna Qylmystyq-prosessýaldyq kodeks talaptaryn buzǵany úshin jeke qaýly shyǵarý tıis edi.

Aıta keterligi, aıyptalýshylardyń týystary sot zalyn tez bosatyp shyqty. Jýrnalıser olardan pikir alýǵa úlgermedi.