Biyl saiysqa álemniń túkpir-túkpirinen 1200-den astam qatysýshylar baqtaryn synap, úzdik degen ataq laiyq bolý úshin kúresti. Bul baiqaýdyń jastardy kásiptik-tehnikalyq mamandyqtarǵa tartýda máni zor. Saiysta jas mamandar ózderiniń mashyqtanǵan mamandyqtary boiynsha sheberlikterin kórsetip, baqtaryn synaidy. San-Paýlo qalasynda ótken bairaqty básekege Qazaqstan atynan Ánýar Dáýrenov (sylaq jáne gips sheberi), Sergei Belonosov (aspaz), Nurlybek Muhamediiarov (dánekerleýshi), Ádilet Tókejanov (dánekerleýshi), Raiymbek Ishanǵaliev (IT- maman), Qanat Erman (kirpish qalaýshy), Anar Janbosynova (shashtaraz), syndy órender qatysyp, qazaq jastarynyń kásiptik mamandyqtardy igerýge airyqsha mán bergenin ispen dáleldedi. Jarys barysynda Qazaqstan quramasy elderden kelgen qarsylastarymen básekelesip, ózderiniń mamandyqtaryna degen ikemdilikteri men tájiribesin kórsetti.
Chempionattyń nátijesinde Sergei Belonosov «Best of Nation» nominatsiiasynyń medalin jeńip alsa, Ádilet Tókejanov «Qyrnaýshylyq is» komandalyq jarysynda jeńiske jetip, «WorldSkills Competition» medaline ie boldy. Bizdiń quramanyń sarapshysy «Kirpishti qalaý» quzyreti boiynsha Qýanysh Aitjanov «WorldSkills Competition Expert» arnaiy ataǵy men WorldSkills International sarapshylar qoǵamdastyǵynyń tolyq múshesi atandy. Tehnikalyq delegat WorldSkills Kazakhstan Ulan Jarmuhamedov «Shashtaraz isi» quzyreti boiynsha qazylar alqasynyń tóraǵasy retinde eńbegi sińgeni úshin WorldSkills Jury President altyn medalin keýdesine taǵyp qaitty. Osylaisha álemdik jarysqa alǵash ret qatysqan Qazaqstan komandasy kók teńizdiń arǵy jaǵynda ótken jarystan úlken oljamen oraldy.
Osy rette ulttyq quramanyń barlyq qatysýshylary – osy jyly elimizde alǵash ret uiymdastyrylǵan WorldSkills Kazakhstan ulttyq chempionatynyń jeńimpazdary ekenin aita ketýimiz kerek. Endi chempionat elimizde jyl saiyn uiymdastyrylyp, tehnikalyq jáne kásiptik bilim berý júiesindegi mańyzdy is-sharalardyń birine ainalmaq.
WorldSkills halyqaralyq baiqaýy álemde jumysshy kásibi dárejesin kóterip, jalpy álemdik standarttar boiynsha kásibi bilim berý isin damytýdy kózdeitin shara. WorldSkills Kazakhstan Ulttyq chempionatynda 18-den 22 jas aralyǵyndaǵy aýmaqtyq týrnirler men óndiris ókilderiniń 70 jeńimpazy qatysqan bolatyn. Chempionat 7 kezeńnen turyp, jas mamandar sylaq jáne gipsokarton jumystary, aspazdyq is, dánekerleý jumystary, aǵash joný jumystary, kirpish qalaý, shashtaraz isi, IT-júiesin basqarý boiynsha synǵa túsken edi.
Nurlan ÁÝBÁKIR
