بيىل سايىسقا الەمنىڭ تۇكپىر-تۇكپىرىنەن 1200-دەن استام قاتىسۋشىلار باقتارىن سىناپ، ۇزدىك دەگەن اتاق لايىق بولۋ ءۇشىن كۇرەستى. بۇل بايقاۋدىڭ جاستاردى كاسىپتىك-تەحنيكالىق ماماندىقتارعا تارتۋدا ءمانى زور. سايىستا جاس ماماندار وزدەرىنىڭ ماشىقتانعان ماماندىقتارى بويىنشا شەبەرلىكتەرىن كورسەتىپ، باقتارىن سىنايدى. سان-پاۋلو قالاسىندا وتكەن بايراقتى باسەكەگە قازاقستان اتىنان ءانۋار داۋرەنوۆ (سىلاق جانە گيپس شەبەرى)، سەرگەي بەلونوسوۆ (اسپاز)، نۇرلىبەك مۇحامەدياروۆ (دانەكەرلەۋشى)، ادىلەت توكەجانوۆ (دانەكەرلەۋشى)، رايىمبەك يشانعالييەۆ (IT- مامان)، قانات ەرمان (كىرپىش قالاۋشى)، انار جانبوسىنوۆا (شاشتاراز)، سىندى ورەندەر قاتىسىپ، قازاق جاستارىنىڭ كاسىپتىك ماماندىقتاردى يگەرۋگە ايرىقشا ءمان بەرگەنىن ىسپەن دالەلدەدى. جارىس بارىسىندا قازاقستان قۇراماسى ەلدەردەن كەلگەن قارسىلاستارىمەن باسەكەلەسىپ، وزدەرىنىڭ ماماندىقتارىنا دەگەن يكەمدىلىكتەرى مەن تاجىريبەسىن كورسەتتى.
چەمپيوناتتىڭ ناتيجەسىندە سەرگەي بەلونوسوۆ «Best of Nation» نوميناسياسىنىڭ مەدالىن جەڭىپ السا، ادىلەت توكەجانوۆ «قىرناۋشىلىق ءىس» كوماندالىق جارىسىندا جەڭىسكە جەتىپ، «WorldSkills Competition» مەدالىنە يە بولدى. ءبىزدىڭ قۇرامانىڭ ساراپشىسى «كىرپىشتى قالاۋ» قۇزىرەتى بويىنشا قۋانىش ايتجانوۆ «WorldSkills Competition Expert» ارنايى اتاعى مەن WorldSkills International ساراپشىلار قوعامداستىعىنىڭ تولىق مۇشەسى اتاندى. تەحنيكالىق دەلەگات WorldSkills Kazakhstan ۇلان جارمۇحامەدوۆ «شاشتاراز ءىسى» قۇزىرەتى بويىنشا قازىلار القاسىنىڭ ءتوراعاسى رەتىندە ەڭبەگى سىڭگەنى ءۇشىن WorldSkills Jury President التىن مەدالىن كەۋدەسىنە تاعىپ قايتتى. وسىلايشا الەمدىك جارىسقا العاش رەت قاتىسقان قازاقستان كومانداسى كوك تەڭىزدىڭ ارعى جاعىندا وتكەن جارىستان ۇلكەن ولجامەن ورالدى.
وسى رەتتە ۇلتتىق قۇرامانىڭ بارلىق قاتىسۋشىلارى – وسى جىلى ەلىمىزدە العاش رەت ۇيىمداستىرىلعان WorldSkills Kazakhstan ۇلتتىق چەمپيوناتىنىڭ جەڭىمپازدارى ەكەنىن ايتا كەتۋىمىز كەرەك. ەندى چەمپيونات ەلىمىزدە جىل سايىن ۇيىمداستىرىلىپ، تەحنيكالىق جانە كاسىپتىك ءبىلىم بەرۋ جۇيەسىندەگى ماڭىزدى ءىس-شارالاردىڭ بىرىنە اينالماق.
WorldSkills حالىقارالىق بايقاۋى الەمدە جۇمىسشى كاسىبي دارەجەسىن كوتەرىپ، جالپى الەمدىك ستاندارتتار بويىنشا كاسىبي ءبىلىم بەرۋ ءىسىن دامىتۋدى كوزدەيتىن شارا. WorldSkills Kazakhstan ۇلتتىق چەمپيوناتىندا 18-دەن 22 جاس ارالىعىنداعى اۋماقتىق تۋرنيرلەر مەن ءوندىرىس وكىلدەرىنىڭ 70 جەڭىمپازى قاتىسقان بولاتىن. چەمپيونات 7 كەزەڭنەن تۇرىپ، جاس ماماندار سىلاق جانە گيپسوكارتون جۇمىستارى، اسپازدىق ءىس، دانەكەرلەۋ جۇمىستارى، اعاش جونۋ جۇمىستارى، كىرپىش قالاۋ، شاشتاراز ءىسى، ىت-جۇيەسىن باسقارۋ بويىنشا سىنعا تۇسكەن ەدى.
نۇرلان اۋباكىر
