Biýdjet tapshylyǵyna urynyp otyrǵan Qazaqstan 2025 jyly quny birneshe milliard teńge bolatyn is-sharalardy ótkizgeli otyrǵany belgili. Máselen, onyń ishinde Astana halyqaralyq forýmynan bastap Jeńistiń 80 jyldyǵyna arnalǵan áskeri sherýlerge deiin bar. Keibir saiasatkerler bul rette Prezidenttiń Úkimettiń keńeitilgen otyrysyndaǵy únem týraly aitqanyn eske salyp, "mundai is-sharalardy ótkizý orynsyz bolmai ma" dep alańdaidy. Osy suraq búgin Senatta bolǵan Ulttyq ekonomika vitse-ministri Arman Qasenovke qoiyldy, dep jazady Dalanews.kz.
Senatta sóz sóilegen Arman Qasenovtyń aitýynsha, túrli forýmdar men sherýlerdi ótkizý elimizdiń bedeli men tanymaldylyǵy úshin kerek. Sondyqtan olarǵa josparlanǵan 1-3 mlrd teńge Qazaqstan ekonomikasyna salmaǵy salystyrmaly túrde onsha bolmaidy.
"Mysaly, "Astana" halyqaralyq forýmyna demeýshilerdiń qarajaty tartylatyn bolady. Biz barlyq somany demeýshiler jabady degen úmittemiz. Biraq, tipti demeýshiler jappai jatqanda da 1,4 mlrd teńge, 2 mlrd teńge siiaqty soma áleýetti investorlardyń osynda tartý, halyqaralyq arenada elimizdiń tanymaldylyǵyn arttyrý úshin jumsaýda asa kóp soma bolyp tabylmaidy", – dedi Arman Qasenov.
Ol Qazaqstanda negizgi kapitalǵa jyldyq investitsiialar 40 mlrd dollardy quraitynyn eske saldy. Tikelei sheteldik investitsiialar - 20 mlrd dollar. Bul kúnine jasalatyn shamamen 50 million dollar tikelei investitsiia degen sóz.
"2-3 million dollar turatyn is-sharany ótkizý oryndy, óitkeni bul bizge investitsiianyń kelýine yqpal etedi. Ekinshiden, bul eksport ósimine yqpal etedi. Iaǵni, bul ekonomikalyq ósimdi jaqsartatyn jáne keiinnen birneshe eseden astam óz jemisin beretin oryndy is-sharalar", dep sózin qorytyndylaidy vitse-ministr
Aita ketsek, 2025 jyly 27 qańtarda bolǵan Úkimettiń keńeitilgen otyrysynda Memleket basshysy Qasym-Jomart Toqaev: "Úkimet qanshalyqty qiyn bolsa da, jappai únemdeýge kóship, biýdjet qarjysyn tek qana asa ózekti máselelerdi sheshýge jumsaýy kerek. Kórpege qarai kósiletin ýaqyt keldi. Orynsyz shyǵyndy toqtatyp, aiaǵymyzdy tartyp basý qajet", degen edi.
