بيۋدجەت تاپشىلىعىنا ۇرىنىپ وتىرعان قازاقستان 2025 جىلى قۇنى بىرنەشە ميلليارد تەڭگە بولاتىن ءىس-شارالاردى وتكىزگەلى وتىرعانى بەلگىلى. ماسەلەن، ونىڭ ىشىندە استانا حالىقارالىق فورۋمىنان باستاپ جەڭىستىڭ 80 جىلدىعىنا ارنالعان اسكەري شەرۋلەرگە دەيىن بار. كەيبىر ساياساتكەرلەر بۇل رەتتە پرەزيدەنتتىڭ ۇكىمەتتىڭ كەڭەيتىلگەن وتىرىسىنداعى ۇنەم تۋرالى ايتقانىن ەسكە سالىپ، "مۇنداي ءىس-شارالاردى وتكىزۋ ورىنسىز بولماي ما" دەپ الاڭدايدى. وسى سۇراق بۇگىن سەناتتا بولعان ۇلتتىق ەكونوميكا ۆيسە-ءمينيسترى ارمان قاسەنوۆكە قويىلدى، دەپ جازادى Dalanews.kz.
سەناتتا ءسوز سويلەگەن ارمان قاسەنوۆتىڭ ايتۋىنشا، ءتۇرلى فورۋمدار مەن شەرۋلەردى وتكىزۋ ەلىمىزدىڭ بەدەلى مەن تانىمالدىلىعى ءۇشىن كەرەك. سوندىقتان ولارعا جوسپارلانعان 1-3 ملرد تەڭگە قازاقستان ەكونوميكاسىنا سالماعى سالىستىرمالى تۇردە ونشا بولمايدى.
"مىسالى، "استانا" حالىقارالىق فورۋمىنا دەمەۋشىلەردىڭ قاراجاتى تارتىلاتىن بولادى. ءبىز بارلىق سومانى دەمەۋشىلەر جابادى دەگەن ۇمىتتەمىز. ءبىراق، ءتىپتى دەمەۋشىلەر جاپپاي جاتقاندا دا 1،4 ملرد تەڭگە، 2 ملرد تەڭگە سياقتى سوما الەۋەتتى ينۆەستورلاردىڭ وسىندا تارتۋ، حالىقارالىق ارەنادا ەلىمىزدىڭ تانىمالدىلىعىن ارتتىرۋ ءۇشىن جۇمساۋدا اسا كوپ سوما بولىپ تابىلمايدى"، – دەدى ارمان قاسەنوۆ.
ول قازاقستاندا نەگىزگى كاپيتالعا جىلدىق ينۆەستيسيالار 40 ملرد دوللاردى قۇرايتىنىن ەسكە سالدى. تىكەلەي شەتەلدىك ينۆەستيسيالار - 20 ملرد دوللار. بۇل كۇنىنە جاسالاتىن شامامەن 50 ميلليون دوللار تىكەلەي ينۆەستيسيا دەگەن ءسوز.
"2-3 ميلليون دوللار تۇراتىن ءىس-شارانى وتكىزۋ ورىندى، ويتكەنى بۇل بىزگە ينۆەستيسيانىڭ كەلۋىنە ىقپال ەتەدى. ەكىنشىدەن، بۇل ەكسپورت وسىمىنە ىقپال ەتەدى. ياعني، بۇل ەكونوميكالىق ءوسىمدى جاقسارتاتىن جانە كەيىننەن بىرنەشە ەسەدەن استام ءوز جەمىسىن بەرەتىن ورىندى ءىس-شارالار"، دەپ ءسوزىن قورىتىندىلايدى ۆيسە-مينيستر
ايتا كەتسەك، 2025 جىلى 27 قاڭتاردا بولعان ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ: "ۇكىمەت قانشالىقتى قيىن بولسا دا، جاپپاي ۇنەمدەۋگە كوشىپ، بيۋدجەت قارجىسىن تەك قانا اسا وزەكتى ماسەلەلەردى شەشۋگە جۇمساۋى كەرەك. كورپەگە قاراي كوسىلەتىن ۋاقىت كەلدى. ورىنسىز شىعىندى توقتاتىپ، اياعىمىزدى تارتىپ باسۋ قاجەت"، دەگەن ەدى.
