AQSh prezidenti Donald Tramp Venesýelanyń ýaqytsha biligi Amerika Qurama Shtattaryna 30–50 million barrelge deiin munai jetkizetinin málimdedi, dep habarlaidy Dalanews.kz
Tramptyń aitýynsha, bul kólemdegi joǵary sapaly munai naryqtyq baǵada satylady, al túsken qarjyny ol jeke baqylaýynda ustaidy.
«Bul qarajat Venesýela halqy men Amerika Qurama Shtattarynyń igiligi úshin paidalanylýyn qamtamasyz etý maqsatynda meniń baqylaýymda bolady», – dep jazdy Tramp Truth Social áleýmettik jelisinde.
AQSh prezidenti bul jospardy dereý iske asyrýdy Energetika ministri Kris Raitqa tapsyrǵanyn aitty. Munai tankerlermen tikelei AQSh aýmaǵyna jetkizilip, el ishindegi qoimalarǵa túsiriledi.
Venesýela álemdegi eń iri munai qoryna ie elderdiń biri sanalady. El aýmaǵynda jahandyq munai qorynyń shamamen 17 paiyzy ornalasqan. Alaida tiimsiz basqarý, ulttyqtandyrý saiasaty jáne halyqaralyq sanktsiialar saldarynan qazirgi ýaqytta Venesýela álemdik munai óndirisiniń 1 paiyzyna da jetpeitin kólemde ǵana óndiredi.
Eske salaiyq, 2025 jylǵy jeltoqsannyń ortasynda Donald Tramp Venesýelaǵa baǵyttalǵan, sanktsiiaǵa ilikken barlyq tankerlerge tolyq blokada engizgen bolatyn. Al 3 qańtarda AQSh áskerileriniń Venesýela prezidenti Nikolas Madýrony tutqyndaýynan keiin Tramp munai embargosynyń saqtalatynyn málimdegen edi.
Keiinirek AQSh prezidenti amerikalyq munai kompaniialary ókilderimen Venesýeladaǵy jaǵdaidy talqylaǵanyn aityp, olardyń elge qaita oralýǵa jáne munai salasyn qalpyna keltirýge múddeli ekenin jetkizdi. Sonymen birge Tramp AQSh Venesýelanyń tabiǵi resýrstarynan ekonomikalyq paida kóre alatynyn da atap ótti.
Aita keteiik, 5 qańtarda Venesýelanyń burynǵy vitse-prezidenti Delsi Rodriges ýaqytsha memleket basshysy retinde ant qabyldaǵan bolatyn. Ol buǵan deiin eldiń ekonomika jáne qarjy, sondai-aq munai ministri qyzmetterin qatar atqarǵan.
