Elordadaǵy óńirlik kommýnikatsiialyq qyzmet alańynda ótken brifingte Astana qalasy Bilim basqarmasynyń basshysy Qasymhan Senǵazyev vaýcherlik qarjylandyrý júiesiniń tiimdi tustaryn atady, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
Mektepke deiingi bilim berýde vaýcherlik qarjylandyrý jobasy Qazaqstan aýmaǵy boiynsha iske asyrylyp jatyr. Sonyń aiasynda kezekke turýdan bastap, mektepke deiingi uiymdardyń qyzmetterine aqy tóleýge deiingi barlyq protsedýra tolyq qaita qaralýda.
– Vaýcherlik qarjylandyrý júiesiniń tiimdi tustary: Birinshiden, vaýcher alǵan ata-analar tizimge engizilgen kez kelgen balabaqshaǵa oryn alady. Bul ata-analarǵa tańdaý erkindigin beredi jáne balabaqshalarǵa kelýshilerdi tartý jáne ustap turý boiynsha qyzmet kórsetý sapasyn jaqsartýǵa kúshti yntalandyrý jasaidy.
Nátijesinde biz «ádildik» qaǵidasyna qol jetkizemiz. Ekinshiden, eń mańyzdy ózgeris – balabaqshalardyń jumysyn baǵalaýdyń qaita oilastyrylǵan tásili. Ata-analar bilim berý qyzmetiniń sapasyn tikelei baǵalaityn bolady. Bul sýbektivtilikti joiyp, qyzmet kórsetýdiń jalpy deńgeiin arttyrady. Sonymen qatar joba salaýatty básekelestik týdyratyn jáne sapany aitarlyqtai jaqsartatyn naryqtyń jańa quryltaishylaryna esik ashady. Tiisinshe, bul qadam «sapa» printsipine jeteleidi. Úshinshiden, jergilikti atqarýshy organdardyń árbir balabaqshaǵa memlekettik tapsyrys kólemin bekitý fýnktsionaldyǵy joiylady jáne vaýcherlik qarjylandyrýǵa tolyǵymen kóshý júzege asyrylady, iaǵni endi qarajat balaǵa beriledi. Eger bala basqa balabaqshany tańdap, aýysqan jaǵdaida, vaýcher sol balamen basqa balabaqshaǵa aýysady. Osylaisha, «ashyqtyq» printsipine qol jetkiziledi», - dedi basqarma basshysy.
Vaýcherlik qarjylandyrýdyń negizgi qaǵidattary:
- balabaqshaǵa oryn úshin kezekke tursa, qazir vaýcherge kezekke turady.
- balabaqshany Bilim basqarmasy anyqtasa, qazir balabaqshany ata-ana tańdaidy.
- memlekettik tapsyrys balabaqshaǵa bekitilse, qazir vaýcher balanyń sońynan eredi.
