Májilis depýtaty Sergei Ponomarev FlyArystan áýekompaniiasynyń jumysyna qatysty óziniń áleýmettik jelidegi paraqshasynda pikir bildirip, jinalǵan shaǵymdar negizinde depýtattyq saýal joldaitynyn málimdedi, dep habarlaidy Dalanews.kz.
"FlyArystan týraly jazbaǵan adam qalmaǵan shyǵar. Men de uzaq ýaqyt úndemei keldim. Biraq búgin, ushýǵa segiz kún qalǵanda reistiń 10 saǵat 45 minýtqa keshiktiriletini habarlanǵan kezde, shydamym taýsyldy. Eshqandai túsinikteme berilmedi. Bul – bul kompaniia úshin úirenshikti jaǵdai. Olar jolaýshylarmen durys bailanys ornatpaidy, keshirim suramaidy, sebep túsindirmeidi. Al olar adamdarmen, ári adamdar úshin jumys isteidi ǵoi", – dep jazdy depýtat.
Sergei Ponomarev buǵan deiin de FlyArystan qyzmeti barysynda qiyndyqtarǵa tap bolǵanyn aitady. Onyń aitýynsha, qarapaiym kitap pen zattar salynǵan paket úshin 11 myń teńge artyq tóleýge májbúr bolǵan. Sonymen qatar, ony aldyn ala eskertpesten, birneshe saǵat reis keshikken jaǵdailar da oryn alǵan.
"Bul – meniń ǵana basymnan ótken jaǵdai emes. FlyArystan-men bailanysty mundai oqiǵalar myńdap sanalady. Biraq olarǵa bul esh áser etpeitin sekildi. Kompaniia qyzmetkerleri artyq júk úshin jolaýshylardy jaýap berýge, qosymsha tólem jasaýǵa májbúrlegen kezde budan lázzat alatyndai kórinedi", – deidi ol.
Depýtattyń aitýynsha, qazir biletti qaitarý nemese aýystyrý tolyq bilet baǵasyna jýyq somaǵa túsedi. Al FlyArystan ózin «biýdjettik, arzan, loýkoster, dástúrli qyzmetterden bas tartý arqyly jolaqyny tómen usynatyn kompaniia» retinde kórsetedi.
– Osyǵan bailanysty men depýtattyq saýal daiyndap jatyrmyn jáne kompaniia ókilderimen jeke kezdesip, jinalǵan suraqtarǵa jaýap izdeimin. Óz suraqtaryńyzdy osy jazbanyń astyna qaldyra berińizder, – dep túiindedi Sergei Ponomarev.
