ءماجىلىس دەپۋتاتى سەرگەي پونوماريەۆ FlyArystan اۋەكومپانياسىنىڭ جۇمىسىنا قاتىستى ءوزىنىڭ الەۋمەتتىك جەلىدەگى پاراقشاسىندا پىكىر ءبىلدىرىپ، جينالعان شاعىمدار نەگىزىندە دەپۋتاتتىق ساۋال جولدايتىنىن مالىمدەدى، دەپ حابارلايدى Dalanews.kz.
"FlyArystan تۋرالى جازباعان ادام قالماعان شىعار. مەن دە ۇزاق ۋاقىت ۇندەمەي كەلدىم. ءبىراق بۇگىن، ۇشۋعا سەگىز كۇن قالعاندا رەيستىڭ 10 ساعات 45 مينۋتقا كەشىكتىرىلەتىنى حابارلانعان كەزدە، شىدامىم تاۋسىلدى. ەشقانداي تۇسىنىكتەمە بەرىلمەدى. بۇل – بۇل كومپانيا ءۇشىن ۇيرەنشىكتى جاعداي. ولار جولاۋشىلارمەن دۇرىس بايلانىس ورناتپايدى، كەشىرىم سۇرامايدى، سەبەپ تۇسىندىرمەيدى. ال ولار ادامدارمەن، ءارى ادامدار ءۇشىن جۇمىس ىستەيدى عوي"، – دەپ جازدى دەپۋتات.
سەرگەي پونوماريەۆ بۇعان دەيىن دە FlyArystan قىزمەتى بارىسىندا قيىندىقتارعا تاپ بولعانىن ايتادى. ونىڭ ايتۋىنشا، قاراپايىم كىتاپ پەن زاتتار سالىنعان پاكەت ءۇشىن 11 مىڭ تەڭگە ارتىق تولەۋگە ءماجبۇر بولعان. سونىمەن قاتار، ونى الدىن الا ەسكەرتپەستەن، بىرنەشە ساعات رەيس كەشىككەن جاعدايلار دا ورىن العان.
"بۇل – مەنىڭ عانا باسىمنان وتكەن جاعداي ەمەس. FlyArystan-مەن بايلانىستى مۇنداي وقيعالار مىڭداپ سانالادى. ءبىراق ولارعا بۇل ەش اسەر ەتپەيتىن سەكىلدى. كومپانيا قىزمەتكەرلەرى ارتىق جۇك ءۇشىن جولاۋشىلاردى جاۋاپ بەرۋگە، قوسىمشا تولەم جاساۋعا ماجبۇرلەگەن كەزدە بۇدان ءلاززات الاتىنداي كورىنەدى"، – دەيدى ول.
دەپۋتاتتىڭ ايتۋىنشا، ءقازىر بيلەتتى قايتارۋ نەمەسە اۋىستىرۋ تولىق بيلەت باعاسىنا جۋىق سوماعا تۇسەدى. ال FlyArystan ءوزىن «بيۋدجەتتىك، ارزان، لوۋكوستەر، ءداستۇرلى قىزمەتتەردەن باس تارتۋ ارقىلى جولاقىنى تومەن ۇسىناتىن كومپانيا» رەتىندە كورسەتەدى.
– وسىعان بايلانىستى مەن دەپۋتاتتىق ساۋال دايىنداپ جاتىرمىن جانە كومپانيا وكىلدەرىمەن جەكە كەزدەسىپ، جينالعان سۇراقتارعا جاۋاپ ىزدەيمىن. ءوز سۇراقتارىڭىزدى وسى جازبانىڭ استىنا قالدىرا بەرىڭىزدەر، – دەپ تۇيىندەدى سەرگەي پونوماريەۆ.
