Qazaqstandyq sarapshy Ǵaziz Ábishev USAID jobalarynyń bir bóliginiń qysqarýy jaily pikir bildire otyryp, halyqaralyq uiymdar men qorlardyń áleýmettik baǵyttaǵy bastamalaryn qoldaitynyn atap ótti, dep habarlaidy Dalanews.kz.
Másele, onyń oiynsha, saiasi sipattaǵy nemese saiasilanýy yqtimal baǵdarlamalarda jatyr. Mundai jobalar syrttai qoǵamdyq igilikti kózdeitindei kóringenimen, shyn máninde saiasi yqpal nemese qysym kórsetý quralyna ainalyp ketýi múmkin.
Sarapshy USAID ne ózge de amerikalyq qurylymdar qarjylandyratyn jobalardyń úsh túrli múddeli toby baryn atap ótti.
"Birinshisi – ideiany shynaiy qoldaityn ári ony qandai jaǵdai bolmasyn júzege asyra beretin azamattar. Ekinshisi – senimi AQSh-tyń qundylyqtarymen úilesetin, alaida jetkilikti resýrssyz qalǵandar. Al úshinshisi – jeke ambitsiiasy basym, printsipke emes, grant berýishiniń talaby men kún tártibine beiimdeletinder", - deidi ol.
Ábishevtiń aitýynsha, syrt kózge bul toptardy ajyratý ońai emes, biraq olardyń saiasi jáne adamgershilik ustanymdary aitarlyqtai ártúrli.
"Taǵy bir másele – sheteldik grantty igerýshilerdiń keibiri ózderin basqalardan "biik" sanap, ózgeshe pikir aitqandarǵa mensinbei qaraýǵa beiim. Eger olar shyn senimmen áreket etse - qisyndy, al eger tek qarjy múddesi úshin iske kirisse, kúmán týdyrady", - dep qosty ol.
Sol sebepti sarapshynyń pikirinshe, bárin birdei "igi maqsat jolynda" áreket etip jatyr dep sanaý - qate.
Ǵaziz Ábishevtiń aitýynsha, AQSh-tyń óz ishinde de (mysaly, memlekettik hatshy Rýbionyń syny) USAID siiaqty uiymdardyń saiasi mazmundaǵy jobalaryna qatysty kásibi jáne saiasi saýaldar kóbeigen.
"Endeshe, "joǵaryda" kúmán týǵyzǵan bastamalar boiynsha suraqtar Qazaqstan qoǵamy men biligi tarapynan da qoiylýy múmkin", - deidi ol.
Degenmen, sarapshynyń paiymdaýynsha, USAID-tiń birqatar áleýmettik-damý jobalary aldaǵy ýaqytta basqa formada bolsyn, qaita jandanady. Al eger granttyq baǵdarlamalardyń irikteý júiesinde olqylyq anyqtalsa, tiisti ózgeris engizilýi múmkin.
