قازاقستاندىق ساراپشى عازيز ابىشيەۆ USAID جوبالارىنىڭ ءبىر بولىگىنىڭ قىسقارۋى جايلى پىكىر بىلدىرە وتىرىپ، حالىقارالىق ۇيىمدار مەن قورلاردىڭ الەۋمەتتىك باعىتتاعى باستامالارىن قولدايتىنىن اتاپ ءوتتى، دەپ حابارلايدى Dalanews.kz.

ماسەلە، ونىڭ ويىنشا، ساياسي سيپاتتاعى نەمەسە ساياسيلانۋى ىقتيمال باعدارلامالاردا جاتىر. مۇنداي جوبالار سىرتتاي قوعامدىق يگىلىكتى كوزدەيتىندەي كورىنگەنىمەن، شىن مانىندە ساياسي ىقپال نەمەسە قىسىم كورسەتۋ قۇرالىنا اينالىپ كەتۋى مۇمكىن.

ساراپشى USAID نە وزگە دە امەريكالىق قۇرىلىمدار قارجىلاندىراتىن جوبالاردىڭ ءۇش ءتۇرلى مۇددەلى توبى بارىن اتاپ ءوتتى.

"ءبىرىنشىسى – يدەيانى شىنايى قولدايتىن ءارى ونى قانداي جاعداي بولماسىن جۇزەگە اسىرا بەرەتىن ازاماتتار. ەكىنشىسى – سەنىمى اقش-تىڭ قۇندىلىقتارىمەن ۇيلەسەتىن، الايدا جەتكىلىكتى رەسۋرسسىز قالعاندار. ال ءۇشىنشىسى – جەكە امبيسياسى باسىم، پرينسيپكە ەمەس، گرانت بەرۋىشىنىڭ تالابى مەن كۇن تارتىبىنە بەيىمدەلەتىندەر"، - دەيدى ول.

ابىشيەۆتىڭ ايتۋىنشا، سىرت كوزگە بۇل توپتاردى اجىراتۋ وڭاي ەمەس، ءبىراق ولاردىڭ ساياسي جانە ادامگەرشىلىك ۇستانىمدارى ايتارلىقتاي ءارتۇرلى.

"تاعى ءبىر ماسەلە – شەتەلدىك گرانتتى يگەرۋشىلەردىڭ كەيبىرى وزدەرىن باسقالاردان "بيىك" ساناپ، وزگەشە پىكىر ايتقاندارعا مەنسىنبەي قاراۋعا بەيىم. ەگەر ولار شىن سەنىممەن ارەكەت ەتسە - قيسىندى، ال ەگەر تەك قارجى مۇددەسى ءۇشىن ىسكە كىرىسسە، كۇمان تۋدىرادى"، - دەپ قوستى ول.

سول سەبەپتى ساراپشىنىڭ پىكىرىنشە، ءبارىن بىردەي "يگى ماقسات جولىندا" ارەكەت ەتىپ جاتىر دەپ ساناۋ - قاتە.

عازيز ابىشيەۆتىڭ ايتۋىنشا، اقش-تىڭ ءوز ىشىندە دە (مىسالى، مەملەكەتتىك حاتشى رۋبيونىڭ سىنى) USAID سياقتى ۇيىمداردىڭ ساياسي مازمۇنداعى جوبالارىنا قاتىستى كاسىبي جانە ساياسي ساۋالدار كوبەيگەن.

"ەندەشە، "جوعارىدا" كۇمان تۋعىزعان باستامالار بويىنشا سۇراقتار قازاقستان قوعامى مەن بيلىگى تاراپىنان دا قويىلۋى مۇمكىن"، - دەيدى ول.

دەگەنمەن، ساراپشىنىڭ پايىمداۋىنشا، USAIDء-تىڭ ءبىرقاتار الەۋمەتتىك-دامۋ جوبالارى الداعى ۋاقىتتا باسقا فورمادا بولسىن، قايتا جاندانادى. ال ەگەر گرانتتىق باعدارلامالاردىڭ ىرىكتەۋ جۇيەسىندە ولقىلىق انىقتالسا، ءتيىستى وزگەرىس ەنگىزىلۋى مۇمكىن.