Qazaqstan Respýblikasynyń Ulttyq qaýipsizdik komiteti (UQK) vedomstvo atyn paidalanyp jasalyp jatqan alaiaqtyq áreketterge bailanysty resmi eskertý jasady, dep habarlaidy Dalanews.kz.
Vedomstvo málimetinshe, sońǵy ýaqytta UQK men ózge de arnaiy qyzmet ókilderi retinde tanystyrylǵan alaiaqtardyń qońyraý shalyp nemese messendjer arqyly bailanys ornatý faktileri kóbeigen. Olar azamattarǵa qatysty tergeý júrgizilip jatqanyn nemese olardyń bank shottarynda kúmándi operatsiialar tirkelgenin aityp, senimine kirýge tyrysady.
Keibir jaǵdailarda alaiaqtar ulttyq qaýipsizdikke tóngen qaýip týraly nemese terroristik aktiniń aldyn alý úshin “arnaiy operatsiia” júrip jatqanyn alǵa tartady.
“Alaiaqtar senim uialatý úshin beineqońyraý arqyly jalǵan qyzmettik kýálikter kórsetip, UQK logotipi bar jalǵan qujattar jiberedi jáne arnaiy qyzmetterge tán kásibi terminderdi qoldanady. Mundaǵy basty maqsat – azamatty óziniń qarajaty qaýipte ekenine sendirý”, – delingen UQK málimdemesinde.
Alaiaqtardyń jii qoldanatyn tásilderi mynalar:
- Qarajatty “tekserý” nemese “saqtaý” maqsatynda jalǵan “qaýipsiz shotqa” aýdarýǵa kóndirý;
- “Jinaqtaryńyzdy saqtaý” jeleýimen nesie rásimdetý;
- KNB atynan jumysqa ornalastyrý nemese áleýmettik máseleni sheshý boiynsha aqyly kómek usyný.
Atalǵan áreketter Qazaqstan Respýblikasy Qylmystyq kodeksiniń 190-baby (“Alaiaqtyq”) jáne 385-baby (“Jalǵan qujattardy jasaý, paidalaný nemese ótkizý”) boiynsha qylmys bolyp sanalady.
“Quqyq qorǵaý jáne arnaiy organdardyń qyzmetkerleri eshqashan azamattarǵa terroristik aktilerdiń aldyn alý syltaýymen nemese qandai da bir basqa jeleýmen aqsha aýdarýdy talap etip qońyraý shalmaidy”, – dep atap ótti UQK baspasóz qyzmeti.
Osyǵan bailanysty UQK azamattardy qyraǵy bolýǵa, kúmándi qońyraýlar men habarlamalarǵa senbeýge, jeke derekter men bank rekvizitterin bógde adamdarǵa bermeýge shaqyrady.
“Eger siz osyndai jaǵdaiǵa tap bolsańyz, birden politsiia organdaryna júginip, oqiǵa jaily tolyq aqparat berińiz”, – dep keńes beredi UQK ókilderi.
Baspasóz qyzmetiniń málimetinshe, tsifrlyq tehnologiialar men qashyqtan qyzmet kórsetý keń taralǵan qazirgi zamanda alaiaqtar psihologiialyq qysym kórsetý tásilderin jetildire túsýde. Osyndai jaǵdaida tek qana aqparattylyq pen saqtyq azamattardy qylmyskerlerdiń qurbany bolýdan qorǵai alady.
