Қазақша Qazaqsha قازاقشا Русский
DALA INSIDE-qa ótý
Dala 360 Politica Vox Populi Dala Finance Shartarap Bile júrińiz! Referendým
Bilim Suhbat Zań men Tártip Aimaq Jumysshy jyly Aityldy – oryndaldy Bas taqyryp Saraptama Dál qazir Taza Qazaqstan AES: Referendým
DalaNews visual

Ýniversiada. Konkimen júgirýden qazaqtyń namysyn Afrikanyń qara balasy qorǵaidy

Dalanews
Ýniversiada. Konkimen júgirýden qazaqtyń namysyn Afrikanyń qara balasy qorǵaidy
28-Búkilálemdik Qysqy Ýniversiada oiyndarynyń baǵdarlamasyna engen 12 qysqy sport túriniń biri – konkimen júgirý sporty. Bul sport túri Qazaqstan halqyna tańsyq emes. Sebebi, Almatyda elý jylǵa jýyq ýaqyt konki sportynan talai odaqtyq, halyqaralyq dodalar ótkizgen, «rekordtar fabrikasy» atanǵan «Medeý» muz aidyny bar. Ýniversiada qarsańynda Qazaqstan jankúierlerin ári qýantyp, ári tańdandyryp otyrǵany – konkimen júgirýden el namysyn qorǵaityn sportshy bolyp otyr, – «Almaty aqshamy» gazetiniń tilshisi.

Ol – qara qurlyqtaǵy Kongo eliniń týma­sy, halyqaralyq dárejedegi sport sheberi, Qazaqstan quramasy múshesi Darsil Essamambo.

Jiyrma úsh jastaǵy Darsil Essamambo anasynyń týǵan jeri Almatyǵa Kongo Respýblikasynan osydan 20 jyl buryn sábi shaǵynda kelgen eken. Bizdiń eldiń jieni Darsil 11 jasynan bastap aiaǵyna konki bailap, osy sport túrimen ainalysa bastaǵan.

Memlekettik tilmen qosa alǵanda úsh tildi erkin meńgergen sportshy búginde talai bairaqty básekede Qazaqstandai Otanynyń namysyn qorǵaǵan.

– Búginde men halyqaralyq dárejedegi sport sheberi ataǵyna qol jetkizdim. Álem kýbogyn jeńip aldym. Biylǵy maýsymnyń basty jarysy – bul meniń súiikti Almatymda ótetin Ýniversiada. Ýniversiada oiyndarynda men Qazaqstan namysyn qorǵap, abyroily bolǵym keledi. Jaqsy óner kórsetip, medal alý múmkindigim bar, – deidi konkiden Qazaqstan qurama komandasy múshesi Darsil Essamambo.

Barlyq jaǵynan biraz otandastaryna úlgi bolarlyq sportshy óz maqsaty jolynda aianbai ter tógip jatqanyn aitady. Aptasyna bes kún daiyndalatyn Darsil kúnine eki ret jattyǵý jasaidy eken. Alaman aldyndaǵy qyzý daiyndyqta júrgen sportshy, qatań dietada júrse de qazaq ashanasynyń qunarly tamaǵyn jaqsy kóretinin aitady.
– Qazyny óte jaqsy kóremin. Qazaqtyń ulttyq taǵamy bolmasa da palaýdy jaqsy kóremin. Sosyn shái ishý. Qymyz, shubat degendei… Qazaqpyz ǵoi endi... – deidi el namysyn tý etken Darsil Essamambo.

Konkimen júgirýden QR qurama komandasynyń múshesi Darsil Essamambo Ýniversiadada 500 metr qashyqtyqta dodaǵa túsedi. Álem kýbogynyń jeńimpazy, halyqaralyq dárejedegi sport sheberi Darsil atalmysh qashyqtyqty 35-36 sekýndta eńserip júr. Bul jattyǵý (500 metr) boiynsha álem rekordy – 34 sekýnd.

Qazaqstandyq sportshynyń bir armany – álemdik rekordty jańartý. Darsil búgingi kúngi basty armany –  Ýniversiada-2017 oiyndarynyń tuǵyrynda Qazaqstan jalaýyn jelbiretý ekenin aitady. Ol óz úiinde, Medeýde ótetin saiystarda otandastarynyń qoldaýyna súienetinine senimdi.

– Men 500 metrlik qashyqtyqta jarysqa shyǵamyn. Jarysta eki ret aidynǵa shyǵyp, eki múmkindiktiń eń jaqsy nátijesi eskeriledi. Saiystar 1 aqpan kúni ótedi. Kelip, bizdiń komandaǵa jankúier bolyńyzdar, – deidi qazaqstandyq sportshy Darsil Essamambo.

Ózin «qazaqpyn» deitin, armandarymen ana tilimizde bólisken, qazaqy minez qara bala osylaisha aǵynan jarylyp jatyr. Armanyńa jet, Darsil!

 

Nurlan SÚIIN
Almaty Ýniversiada Sport «Medeý» muz aidyny Darsil Essamambo konkimen júgirý Madina Sádýaqasova

Oqi otyryńyz