ول – قارا قۇرلىقتاعى كونگو ەلىنىڭ تۋماسى، حالىقارالىق دارەجەدەگى سپورت شەبەرى، قازاقستان قۇراماسى مۇشەسى دارسيل ەسسامامبو.
جيىرما ءۇش جاستاعى دارسيل ەسسامامبو اناسىنىڭ تۋعان جەرى الماتىعا كونگو رەسپۋبليكاسىنان وسىدان 20 جىل بۇرىن ءسابي شاعىندا كەلگەن ەكەن. ءبىزدىڭ ەلدىڭ جيەنى دارسيل 11 جاسىنان باستاپ اياعىنا كونكي بايلاپ، وسى سپورت تۇرىمەن اينالىسا باستاعان.
مەملەكەتتىك تىلمەن قوسا العاندا ءۇش ءتىلدى ەركىن مەڭگەرگەن سپورتشى بۇگىندە تالاي بايراقتى باسەكەدە قازاقستانداي وتانىنىڭ نامىسىن قورعاعان.
– بۇگىندە مەن حالىقارالىق دارەجەدەگى سپورت شەبەرى اتاعىنا قول جەتكىزدىم. الەم كۋبوگىن جەڭىپ الدىم. بيىلعى ماۋسىمنىڭ باستى جارىسى – بۇل مەنىڭ سۇيىكتى الماتىمدا وتەتىن ۋنيۆەرسيادا. ۋنيۆەرسيادا ويىندارىندا مەن قازاقستان نامىسىن قورعاپ، ابىرويلى بولعىم كەلەدى. جاقسى ونەر كورسەتىپ، مەدال الۋ مۇمكىندىگىم بار، – دەيدى كونكيدەن قازاقستان قۇراما كومانداسى مۇشەسى دارسيل ەسسامامبو.
بارلىق جاعىنان ءبىراز وتانداستارىنا ۇلگى بولارلىق سپورتشى ءوز ماقساتى جولىندا ايانباي تەر توگىپ جاتقانىن ايتادى. اپتاسىنا بەس كۇن دايىندالاتىن دارسيل كۇنىنە ەكى رەت جاتتىعۋ جاسايدى ەكەن. الامان الدىنداعى قىزۋ دايىندىقتا جۇرگەن سپورتشى، قاتاڭ ديەتادا جۇرسە دە قازاق اسحاناسىنىڭ قۇنارلى تاماعىن جاقسى كورەتىنىن ايتادى.
– قازىنى وتە جاقسى كورەمىن. قازاقتىڭ ۇلتتىق تاعامى بولماسا دا پالاۋدى جاقسى كورەمىن. سوسىن ءشاي ءىشۋ. قىمىز، شۇبات دەگەندەي… قازاقپىز عوي ەندى... – دەيدى ەل نامىسىن تۋ ەتكەن دارسيل ەسسامامبو.
كونكيمەن جۇگىرۋدەن ق ر قۇراما كومانداسىنىڭ مۇشەسى دارسيل ەسسامامبو ۋنيۆەرسيادادا 500 مەتر قاشىقتىقتا دوداعا تۇسەدى. الەم كۋبوگىنىڭ جەڭىمپازى، حالىقارالىق دارەجەدەگى سپورت شەبەرى دارسيل اتالمىش قاشىقتىقتى 35-36 سەكۋندتا ەڭسەرىپ ءجۇر. بۇل جاتتىعۋ (500 مەتر) بويىنشا الەم رەكوردى – 34 سەكۋند.
قازاقستاندىق سپورتشىنىڭ ءبىر ارمانى – الەمدىك رەكوردتى جاڭارتۋ. دارسيل بۇگىنگى كۇنگى باستى ارمانى – ۋنيۆەرسيادا-2017 ويىندارىنىڭ تۇعىرىندا قازاقستان جالاۋىن جەلبىرەتۋ ەكەنىن ايتادى. ول ءوز ۇيىندە، مەدەۋدە وتەتىن سايىستاردا وتانداستارىنىڭ قولداۋىنا سۇيەنەتىنىنە سەنىمدى.
– مەن 500 مەترلىك قاشىقتىقتا جارىسقا شىعامىن. جارىستا ەكى رەت ايدىنعا شىعىپ، ەكى مۇمكىندىكتىڭ ەڭ جاقسى ناتيجەسى ەسكەرىلەدى. سايىستار 1 اقپان كۇنى وتەدى. كەلىپ، ءبىزدىڭ كومانداعا جانكۇيەر بولىڭىزدار، – دەيدى قازاقستاندىق سپورتشى دارسيل ەسسامامبو.
ءوزىن «قازاقپىن» دەيتىن، ارماندارىمەن انا تىلىمىزدە بولىسكەن، قازاقى مىنەز قارا بالا وسىلايشا اعىنان جارىلىپ جاتىر. ارمانىڭا جەت، دارسيل!
نۇرلان ءسۇيىن
