Úndistan politsiiasy qazaqstandyq velosport bapkeri, burynǵy kásibi veloshabandoz Maqsat Aiazbaevty izdestirip jatyr. Kámeletke tolmaǵan sportshy ony zorlady dep aiyptaǵan, dep habarlaidy dalanews.kz.
Jergilikti BAQ málimetinshe, oqiǵa 13 qyrkúiekte Patiala qalasyndaǵy Netadji Sýbhas atyndaǵy Ulttyq sport institýtynyń aýmaǵynda bolǵan. Jas sportshy 18 qyrkúiekte politsiiaǵa aryz túsirgen. Onyń shaǵymynan keiin Úndistannyń Qylmystyq kodeksi jáne kámeletke tolmaǵandardy jynystyq sipattaǵy qylmystardan qorǵaityn POCSO zańy boiynsha qylmystyq is qozǵalǵan.
The Times of India basylymynyń málimetinshe, qazaqstandyq azamatty izdestirý úshin birneshe politsiia toby qurylǵan.
– Quqyq qorǵaý organdary bapkerdiń oqiǵadan keiin Delidegi jattyǵý jiyndarynyń birinde bolǵany týraly aqparat alǵan. Alaida keiin onyń qaida ketkeni belgisiz bolyp qalǵan, – dep jazady basylym.
Sondai-aq qazaqstandyqtyń tólqujaty politsiianyń qolynda ekeni habarlandy. Budan bólek, oǵan qatysty Look Out Circular jariialanǵan. Bul – shekara jáne kóshi-qon qyzmetterine joldanatyn arnaiy habarlama. Ol kúdiktiniń Úndistan aýmaǵynan shyǵyp ketýine jol bermeýge baǵyttalǵan.
Maqsat Aiazbaev Úndistan quramasymen birge Japoniiada ótetin Aziia oiyndaryna qatysýy tiis bolǵan. Alaida aiyptaýlardan keiin onyń saparǵa shyǵýyna berilgen ruqsat kúshin joiǵan. Úndistannyń Velosport federatsiiasy qazaqstandyq mamandy qyzmetinen shettetip, isti uiymnyń ishki komissiiasynyń qaraýyna tapsyrǵan. Kámeletke tolmaǵan sportshy meditsinalyq tekserýden ótip, oǵan psihologiialyq jáne zańgerlik kómek kórsetilgen.
Aita keteiik, Maqsat Aiazbaev buǵan deiin Qazaqstannyń atynan kásibi tasjol velosporty jarystaryna qatysqan.
