Ulttyq quryltaida rýhani-aǵartý baǵytynda atqarylatyn jumystar talqylanýy tiis – sarapshylar oiy
Qoǵamdy alańdatqan osy máseleler de Túrkistanda ótip jatqan Ulttyq quryltaida talqylandy. Eldiń ál-aýqaty men turmystyq jaǵdaiyn jaqsartý, rýhani aǵartý baǵytynda atqarylýy tiis jumystar qyzý talqylanyp, kópshilik óz oilaryn ashyq jetkizdi.
– Qarjy naryǵy bylai damidy, shikizat naryǵy bylai damidy dep senimdi aqparat aita alatyn, sony dáleldei alatyn senimdi mektepter joq. Tipti, mynaý qazaq tiliniń bolashaǵy qandai? 10 jyldan keiin, 20 jyldan keiin qazaqtyń demografiiasy qandai bolady degen deregimiz bar ma? Osynyń barlyǵyn zerdeleitin ǵylymi ortalyqtar aýadai qajet, – deidi QR Parlamenti Májilisiniń depýtaty Aidos Sarym.
Quryltaida eldegi mádeniet pen dini ahýal da sóz boldy. Aýdan ortalyqtary men shalǵai aýyldarda murajailar men mádeni ortalyqtardy túgendeitin kez jetti deidi ziialy qaýym ókilderi.
– Bizde ár aýylda eki meshitten bar, tipti ótkende tań qaldym. Bir aýylda tórt meshit bar eken. Tórt rýly el eken ol aýyl. Meshitterdi kóbeitpei-aq, halyqqa mektepter, balabaqshalar, sport zaldary, sport mektepterin salyp, balalardyń keleshegimen ainalysaiyq. Biz qazir balalardy betine jiberip alatyn bolsaq, erteń memlekettiń qaýipsizdigine qaýip tónedi. Men endi osy máseleni usynys etip aittym, – deidi jazýshy Sáýle Dosjanova.
Al T.Júrgenov atyndaǵy qazaq ulttyq óner akademiiasynyń rektory Azamat Satybaldy:
– Men barǵan jerdiń bárinde Mádeniet úiiniń istep turǵanyn kórgen joqpyn. Barlyq Mádeniet úilerinde qara qulyp turady. Ol tek qana sol aýyl ákiminiń, aýdan ákiminiń jinalys ótkizetin jeri ǵana bolyp tur. Sondyqtan barynsha aýdandaǵy Mádeniet úilerin barynsha jandandyrý kerek. Sonda ǵana biz solardy sińirý arqyly eldiń rýhyn kóteremiz. Osy máseleni kóterdim. Endi quba-qup qoldap jatsa, men durys dep oilaimyn, – deidi.
