2035 jylǵa qarai Ulttyq qordyń taza valiýtalyq aktivteri 109,9 mlrd dollarǵa deiin ósýi múmkin. Bul týraly QR Premer-ministriniń orynbasary – ulttyq ekonomika ministri Serik Jumanǵarin málimdedi, dep habarlaidy Dalanews.kz.
Vedomstvo 2026–2035 jyldarǵa arnalǵan uzaqmerzimdi damý boljamy jobasyn ázirledi. Qujat memlekettik josparlaý júiesiniń qujattaryn qarjylyq qamtamasyz etý kólemin aiqyndaidy. Joba aiasynda uzaqmerzimdi damýdyń úsh nusqasy qarastyrylǵan: bazalyq, qalypty jáne balamaly.
“Balamaly nusqada 10 jyldaǵy ortasha ekonomikalyq ósim 5,1% deńgeiinde, qalyptysynda – 4,3% bolady dep boljanýda. Bazalyq nusqada 10 jyl ishindegi JIÓ-niń ortasha jyldyq ósimi 4,5% quraidy. 2035 jyly nominaldy JIÓ 473,2 trln teńgege jetedi. 2026–2028 jyldarǵa arnalǵan negizgi kórsetkishter úsh jyldyq áleýmettik-ekonomikalyq damý boljamyna sáikes keledi. 2035 jyly memlekettik biýdjet kiristeri 66,8 trln teńgege deiin ulǵaiady”, – dedi Jumanǵarin Úkimet otyrysynda.
Sonymen qatar 2029 jyldan bastap kepildendirilgen transfertti 2 trln teńgege deiin tómendetý josparlanyp otyr. Biýdjet tapshylyǵy 2029 jyly JIÓ-niń 0,4%-yna deiin qysqaryp, 2030 jyldan bastap nóldik deńgeige jetkiziledi.
Jumanǵarinniń aitýynsha, makroekonomikalyq jáne biýdjettik parametrler boljamyna sáikes memlekettik josparlaý júiesiniń qujattaryn qarjylandyrý kólemi respýblikalyq jáne jergilikti biýdjetterdiń shyǵyndaryn eskere otyryp:
2026 jyly – 37,4 trln teńge;
2027 jyly – 39,6 trln teńge;
2028 jyly – 41,6 trln teńge kóleminde josparlanyp otyr.
Budan bólek, Ulttyq qordyń taza valiýtalyq aktivteri 2026 jylǵy 60,8 mlrd dollardan 2035 jyly 109,9 mlrd dollarǵa deiin ósedi dep kútilýde.
