2035 جىلعا قاراي ۇلتتىق قوردىڭ تازا ۆاليۋتالىق اكتيۆتەرى 109،9 ملرد دوللارعا دەيىن ءوسۋى مۇمكىن. بۇل تۋرالى ق ر پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مالىمدەدى، دەپ حابارلايدى Dalanews.kz.

ۆەدومستۆو 2026–2035 جىلدارعا ارنالعان ۇزاقمەرزىمدى دامۋ بولجامى جوباسىن ازىرلەدى. قۇجات مەملەكەتتىك جوسپارلاۋ جۇيەسىنىڭ قۇجاتتارىن قارجىلىق قامتاماسىز ەتۋ كولەمىن ايقىندايدى. جوبا اياسىندا ۇزاقمەرزىمدى دامۋدىڭ ءۇش نۇسقاسى قاراستىرىلعان: بازالىق، قالىپتى جانە بالامالى.

“بالامالى نۇسقادا 10 جىلداعى ورتاشا ەكونوميكالىق ءوسىم 5،1% دەڭگەيىندە، قالىپتىسىندا – 4،3% بولادى دەپ بولجانۋدا. بازالىق نۇسقادا 10 جىل ىشىندەگى ءجىو-نىڭ ورتاشا جىلدىق ءوسىمى 4،5% قۇرايدى. 2035 جىلى نومينالدى ءجىو 473،2 ترلن تەڭگەگە جەتەدى. 2026–2028 جىلدارعا ارنالعان نەگىزگى كورسەتكىشتەر ءۇش جىلدىق الەۋمەتتىك-ەكونوميكالىق دامۋ بولجامىنا سايكەس كەلەدى. 2035 جىلى مەملەكەتتىك بيۋدجەت كىرىستەرى 66،8 ترلن تەڭگەگە دەيىن ۇلعايادى”، – دەدى جۇمانعارين ۇكىمەت وتىرىسىندا.

سونىمەن قاتار 2029 جىلدان باستاپ كەپىلدەندىرىلگەن ترانسفەرتتى 2 ترلن تەڭگەگە دەيىن تومەندەتۋ جوسپارلانىپ وتىر. بيۋدجەت تاپشىلىعى 2029 جىلى ءجىو-نىڭ 0،4%-ىنا دەيىن قىسقارىپ، 2030 جىلدان باستاپ نولدىك دەڭگەيگە جەتكىزىلەدى.

ءجۇمانعاريننىڭ ايتۋىنشا، ماكروەكونوميكالىق جانە بيۋدجەتتىك پارامەترلەر بولجامىنا سايكەس مەملەكەتتىك جوسپارلاۋ جۇيەسىنىڭ قۇجاتتارىن قارجىلاندىرۋ كولەمى رەسپۋبليكالىق جانە جەرگىلىكتى بيۋدجەتتەردىڭ شىعىندارىن ەسكەرە وتىرىپ:

2026 جىلى – 37،4 ترلن تەڭگە؛

2027 جىلى – 39،6 ترلن تەڭگە؛

2028 جىلى – 41،6 ترلن تەڭگە كولەمىندە جوسپارلانىپ وتىر.

بۇدان بولەك، ۇلتتىق قوردىڭ تازا ۆاليۋتالىق اكتيۆتەرى 2026 جىلعى 60،8 ملرد دوللاردان 2035 جىلى 109،9 ملرد دوللارعا دەيىن وسەدى دەپ كۇتىلۋدە.