Qarjy naryǵyn retteý jáne damytý agenttigi memlekettiń bank sektoryn saýyqtyrýǵa qansha qarjy bólgenin aitty dep habarlaidy Dalanews.kz.
2008-2016 jyldar
"Osy aralyqta qarjy institýttaryna bólingen qarajat 2007-2008 jylǵy jahandyq daǵdarystyń saldaryn joiýǵa baǵyttaldy", – deidi agenttik ókilderi.
Úkimet 4 birdei banktiń aktsiiasyn satyp alý úshin 476,1 mlrd teńge bólgen. Onyń 415 mlrd-y qaitarylypty.
Al qalǵany she?
"Qalǵany BTA bankin qaita qurylymdaýǵa jumsaldy", - deidi agenttik.
2017 jyl
2017 jyly bank sektoryn saýyqtyrý úshin 5 iri qarjylyq institýtqa kómek kórsetilgen eken. Bul beseýge eldegi qaryz portfeliniń 30 paiyzy ári kvazimemlekettik sektor men qarapaiym halyqtyń 25 paiyz depoziti tiesili.
"Kórsetilgen kómektiń jalpy kólemi 653,7 mlrd teńgeni qurady.
Olarǵa (bankterge) qol ushyn sozýymyzdyń sebebi qaitarylmaǵan nesielerdiń úlesi joǵary boldy. Bular qarjy institýttarynyń kapitalyn azaityp, nesieleý qarqynyn báseńdetip jiberdi.
Memleketten kómek alǵan bankter qaryzdy sońǵy tiynyna deiin ústemesimen qosyp, aldaǵy 13 jyldyń ishinde qaitaryp beredi. 653,7 mlrd qaryz bergen Úkimet shamamen 1 trln teńge tabys tabady. Memleketten qaryz alǵan qarjylyq institýttar ázirgi kúni 2 trln teńgege tarta nesie berip úlgerdi", – deidi Qarjy naryǵyn retteý jáne damytý agenttiginiń ókilderi.
Budan buryn Májiliste depýtattar dabyl qaǵyp, qazaqstandyq bankterdiń Úkimetti "saýyn siyrǵa" ainaldyryp alǵanyn aitty.
"Bularǵa bólingen aqsha maqsatsyz, bei-bereket jumsalýda. Qarjylyq sektordyń saýyǵyp ketkeni shamaly. Bankter áldene bolsa memleketke alaqan jaiýǵa ádettenip aldy. Ekonomikany nesieleýdiń ahýaly men talaptary syn kótermeidi. Ainalyp kelgende bólingen aqsha dalaǵa shashyldy", – deidi depýtat Erlan Barlybaev.
Budan buryn prezident Toqaev bankterdiń biznesti nesieleýin qamtamasyz etip, uzaq jylǵa ári qolaily shartpen kreditteýdi buiyrǵan.
