قارجى نارىعىن رەتتەۋ جانە دامىتۋ اگەنتتىگى مەملەكەتتىڭ بانك سەكتورىن ساۋىقتىرۋعا قانشا قارجى بولگەنىن ايتتى دەپ حابارلايدى Dalanews.kz.
2008-2016 جىلدار
"وسى ارالىقتا قارجى ينستيتۋتتارىنا بولىنگەن قاراجات 2007-2008 جىلعى جاھاندىق داعدارىستىڭ سالدارىن جويۋعا باعىتتالدى"، – دەيدى اگەنتتىك وكىلدەرى.
ۇكىمەت 4 بىردەي بانكتىڭ اكسياسىن ساتىپ الۋ ءۇشىن 476،1 ملرد تەڭگە بولگەن. ونىڭ 415 ملرد-ى قايتارىلىپتى.
ال قالعانى شە؟
"قالعانى بتا بانكىن قايتا قۇرىلىمداۋعا جۇمسالدى"، - دەيدى اگەنتتىك.
2017 جىل
2017 جىلى بانك سەكتورىن ساۋىقتىرۋ ءۇشىن 5 ءىرى قارجىلىق ينستيتۋتقا كومەك كورسەتىلگەن ەكەن. بۇل بەسەۋگە ەلدەگى قارىز پورتفەلىنىڭ 30 پايىزى ءارى كۆازيمەملەكەتتىك سەكتور مەن قاراپايىم حالىقتىڭ 25 پايىز دەپوزيتى تيەسىلى.
"كورسەتىلگەن كومەكتىڭ جالپى كولەمى 653،7 ملرد تەڭگەنى قۇرادى.
ولارعا (بانكتەرگە) قول ۇشىن سوزۋىمىزدىڭ سەبەبى قايتارىلماعان نەسيەلەردىڭ ۇلەسى جوعارى بولدى. بۇلار قارجى ينستيتۋتتارىنىڭ كاپيتالىن ازايتىپ، نەسيەلەۋ قارقىنىن باسەڭدەتىپ جىبەردى.
مەملەكەتتەن كومەك العان بانكتەر قارىزدى سوڭعى تيىنىنا دەيىن ۇستەمەسىمەن قوسىپ، الداعى 13 جىلدىڭ ىشىندە قايتارىپ بەرەدى. 653،7 ملرد قارىز بەرگەن ۇكىمەت شامامەن 1 ترلن تەڭگە تابىس تابادى. مەملەكەتتەن قارىز العان قارجىلىق ينستيتۋتتار ازىرگى كۇنى 2 ترلن تەڭگەگە تارتا نەسيە بەرىپ ۇلگەردى"، – دەيدى قارجى نارىعىن رەتتەۋ جانە دامىتۋ اگەنتتىگىنىڭ وكىلدەرى.
بۇدان بۇرىن ماجىلىستە دەپۋتاتتار دابىل قاعىپ، قازاقستاندىق بانكتەردىڭ ۇكىمەتتى "ساۋىن سيىرعا" اينالدىرىپ العانىن ايتتى.
"بۇلارعا بولىنگەن اقشا ماقساتسىز، بەي-بەرەكەت جۇمسالۋدا. قارجىلىق سەكتوردىڭ ساۋىعىپ كەتكەنى شامالى. بانكتەر الدەنە بولسا مەملەكەتكە الاقان جايۋعا ادەتتەنىپ الدى. ەكونوميكانى نەسيەلەۋدىڭ احۋالى مەن تالاپتارى سىن كوتەرمەيدى. اينالىپ كەلگەندە بولىنگەن اقشا دالاعا شاشىلدى"، – دەيدى دەپۋتات ەرلان بارلىبايەۆ.
بۇدان بۇرىن پرەزيدەنت توقايەۆ بانكتەردىڭ بيزنەستى نەسيەلەۋىن قامتاماسىز ەتىپ، ۇزاق جىلعا ءارى قولايلى شارتپەن كرەديتتەۋدى بۇيىرعان.
