Qazaqstanda 23 sáýir Ulttyq kitap kúni retinde resmi túrde atalyp ótiledi, dep habarlaidy Dalanews.kz.
Ulttyq statistika biýrosynyń deregine qaraǵanda, 2025 jyldyń qorytyndysy boiynsha elde 3 912 kitaphana jumys isteidi. Bul salada 10 myńnan asa adam eńbek etedi. Kitaphanalardyń basym bóligi aýyldyq jerlerde ornalasqan, olardyń sany - 3 343.
Elimizdegi kitaphanalardyń kópshiligi ámbebap baǵytta qyzmet etedi, jalpy sany - 3 866. Sonymen qatar, 20 ǵylymi, 19 arnaiy jáne 7 ózge tiptegi kitaphana bar. Balalarǵa arnalǵan 269 mekeme jumys istep tur.
Óńirler boiynsha eń kóp kitaphana Túrkistan oblysynda tirkelgen, sany - 388. Odan keiin Batys Qazaqstan (359), Aqmola (341) jáne Qostanai (336) oblystary bar. Kitaphanalardaǵy qor 110,3 million basylymdy qamtidy, sonyń ishinde 69,6 milliony - kitap. Eń iri kitap qory Almaty qalasynda shoǵyrlanǵan: 37,5 million basylym.
2025 jyly kitaphanalarǵa kelýshiler sany 55,2 millionǵa jetken. Bul kórsetkish boiynsha Almaty alda: 5,4 million. Sondai-aq, Soltústik Qazaqstan oblysynda 4,6 million, Túrkistan oblysynda 4,1 million kelýshi tirkelgen.
Aita keteiik, Ulttyq kitap kúnin belgileý týraly bastamany Qasym-Jomart Toqaev kótergen edi. Atyraýda ótken Ulttyq quryltaida tiisti tapsyrma berilip, nátijesinde 2025 jyldan bastap 23 sáýir Ulttyq kitap kúni retinde bekitildi.
