Қазақстанда 23 сәуір Ұлттық кітап күні ретінде ресми түрде аталып өтіледі, деп хабарлайды Dalanews.kz.
Ұлттық статистика бюросының дерегіне қарағанда, 2025 жылдың қорытындысы бойынша елде 3 912 кітапхана жұмыс істейді. Бұл салада 10 мыңнан аса адам еңбек етеді. Кітапханалардың басым бөлігі ауылдық жерлерде орналасқан, олардың саны - 3 343.
Еліміздегі кітапханалардың көпшілігі әмбебап бағытта қызмет етеді, жалпы саны - 3 866. Сонымен қатар, 20 ғылыми, 19 арнайы және 7 өзге типтегі кітапхана бар. Балаларға арналған 269 мекеме жұмыс істеп тұр.
Өңірлер бойынша ең көп кітапхана Түркістан облысында тіркелген, саны - 388. Одан кейін Батыс Қазақстан (359), Ақмола (341) және Қостанай (336) облыстары бар. Кітапханалардағы қор 110,3 миллион басылымды қамтиды, соның ішінде 69,6 миллионы - кітап. Ең ірі кітап қоры Алматы қаласында шоғырланған: 37,5 миллион басылым.
2025 жылы кітапханаларға келушілер саны 55,2 миллионға жеткен. Бұл көрсеткіш бойынша Алматы алда: 5,4 миллион. Сондай-ақ, Солтүстік Қазақстан облысында 4,6 миллион, Түркістан облысында 4,1 миллион келуші тіркелген.
Айта кетейік, Ұлттық кітап күнін белгілеу туралы бастаманы Қасым-Жомарт Тоқаев көтерген еді. Атырауда өткен Ұлттық құрылтайда тиісті тапсырма беріліп, нәтижесінде 2025 жылдан бастап 23 сәуір Ұлттық кітап күні ретінде бекітілді.
