قازاقستاندا 23 ءساۋىر ۇلتتىق كىتاپ كۇنى رەتىندە رەسمي تۇردە اتالىپ وتىلەدى، دەپ حابارلايدى Dalanews.kz.
ۇلتتىق ستاتيستيكا بيۋروسىنىڭ دەرەگىنە قاراعاندا، 2025 جىلدىڭ قورىتىندىسى بويىنشا ەلدە 3 912 كىتاپحانا جۇمىس ىستەيدى. بۇل سالادا 10 مىڭنان اسا ادام ەڭبەك ەتەدى. كىتاپحانالاردىڭ باسىم بولىگى اۋىلدىق جەرلەردە ورنالاسقان، ولاردىڭ سانى - 3 343.
ەلىمىزدەگى كىتاپحانالاردىڭ كوپشىلىگى امبەباپ باعىتتا قىزمەت ەتەدى، جالپى سانى - 3 866. سونىمەن قاتار، 20 عىلىمي، 19 ارنايى جانە 7 وزگە تيپتەگى كىتاپحانا بار. بالالارعا ارنالعان 269 مەكەمە جۇمىس ىستەپ تۇر.
وڭىرلەر بويىنشا ەڭ كوپ كىتاپحانا تۇركىستان وبلىسىندا تىركەلگەن، سانى - 388. ودان كەيىن باتىس قازاقستان (359)، اقمولا (341) جانە قوستاناي (336) وبلىستارى بار. كىتاپحانالارداعى قور 110،3 ميلليون باسىلىمدى قامتيدى، سونىڭ ىشىندە 69،6 ميلليونى - كىتاپ. ەڭ ءىرى كىتاپ قورى الماتى قالاسىندا شوعىرلانعان: 37،5 ميلليون باسىلىم.
2025 جىلى كىتاپحانالارعا كەلۋشىلەر سانى 55،2 ميلليونعا جەتكەن. بۇل كورسەتكىش بويىنشا الماتى الدا: 5،4 ميلليون. سونداي-اق، سولتۇستىك قازاقستان وبلىسىندا 4،6 ميلليون، تۇركىستان وبلىسىندا 4،1 ميلليون كەلۋشى تىركەلگەن.
ايتا كەتەيىك، ۇلتتىق كىتاپ كۇنىن بەلگىلەۋ تۋرالى باستامانى قاسىم-جومارت توقايەۆ كوتەرگەن ەدى. اتىراۋدا وتكەن ۇلتتىق قۇرىلتايدا ءتيىستى تاپسىرما بەرىلىپ، ناتيجەسىندە 2025 جىلدان باستاپ 23 ءساۋىر ۇلتتىق كىتاپ كۇنى رەتىندە بەكىتىلدى.
