QR Ulttyq banktiń tóraǵasy Timýr Súleimenov Májilis dázilinde jýrnalisterge bergen suqbatynda teńge nege qunsyzdanyp, dollardyń nyǵaiýyna qandai faktorlar áser etip jatqanyn aitty, dep habarlaidy Dalanews.kz.
Timýr Súleimenov Qazaqstan ekonomikasy munaidan túsken tabysqa qatty táýeldi ekenin, al qazir munai naryǵynda belgili bir turaqsyzdyq baiqalatynyn atap ótti.
"Sońǵy aptalarda munaidyń bir barreli 80 dollardan búginderi 71,5 dollarǵa deiin tómendedi. Onyń ulttyq valiýtamyzdyń baǵamyna áser etpeýi múmkin emes. Ekinshiden, qazaqstandyq zańdy tulǵalar tarapynan suranystyń artqanyn kórip otyrmyz. Dollarǵa degen. Biz, negizinen, biýdjet nemese kvazimemlekettik sektordyń qarajaty esebinen qarjylandyrylatyn investitsiialyq jobalardy iske asyrýmen bailanysty", - dep túsindirdi Ulttyq bank basshysy
Onyń aitýynsha, bul biýdjettik protsestermen bailanysty jait.
"Jyldyń basynda esep-qisap josparlanady, sodan keiin tenderlik rásimder júrgiziledi, sonda jyl sońyna qarai bul aqsha igerile bastaidy. Kóptegen investitsiialyq, infraqurylymdyq jobalar, ókinishke qarai, áli de importqa táýeldi. Nátijesinde, 4-toqsanda biz valiýtaǵa suranystyń artqanyn kórip otyrmyz.Buǵan valiýta birjasyndaǵy saýda-sattyqtyń naqty kólemi dálel. Qazir onyń kólemi táýligine 290 milliondy quraidy, al ortasha táýliktegi deńgeii 200 million shamasynda bolýy tiis, iaǵni birjadaǵy saýda-sattyqtyń ortasha kóleminen 30-40% - ǵa joǵary", - dep atap ótti Súleimenov.
Aita ketsek, búgin, 2024 jyly 30 qazanda Májilis 2025-2027 jyldarǵa arnalǵan respbýlikalyq biýdjetti qabyldady.
Taqyrypqa orai: Ulttyq bank tóraǵasynyń málimdemesi Úkimet múshelerin selt etkizdi
