ق ر ۇلتتىق بانكتىڭ ءتوراعاسى تيمۋر سۇلەيمەنوۆ ءماجىلىس دازىلىندە جۋرناليستەرگە بەرگەن سۇقباتىندا تەڭگە نەگە قۇنسىزدانىپ، دوللاردىڭ نىعايۋىنا قانداي فاكتورلار اسەر ەتىپ جاتقانىن  ايتتى، دەپ حابارلايدى Dalanews.kz.

تيمۋر سۇلەيمەنوۆ قازاقستان ەكونوميكاسى مۇنايدان تۇسكەن تابىسقا قاتتى تاۋەلدى ەكەنىن، ال ءقازىر مۇناي نارىعىندا بەلگىلى ءبىر تۇراقسىزدىق بايقالاتىنىن اتاپ ءوتتى.

"سوڭعى اپتالاردا مۇنايدىڭ ءبىر باررەلى 80 دوللاردان بۇگىندەرى  71،5 دوللارعا دەيىن تومەندەدى. ونىڭ ۇلتتىق ۆاليۋتامىزدىڭ باعامىنا اسەر ەتپەۋى مۇمكىن ەمەس. ەكىنشىدەن،  قازاقستاندىق زاڭدى تۇلعالار تاراپىنان سۇرانىستىڭ ارتقانىن كورىپ وتىرمىز. دوللارعا دەگەن. ءبىز، نەگىزىنەن، بيۋدجەت نەمەسە كۆازيمەملەكەتتىك سەكتوردىڭ قاراجاتى ەسەبىنەن قارجىلاندىرىلاتىن ينۆەستيسيالىق جوبالاردى ىسكە اسىرۋمەن بايلانىستى"، - دەپ ءتۇسىندىردى ۇلتتىق بانك باسشىسى

ونىڭ ايتۋىنشا، بۇل بيۋدجەتتىك پروسەستەرمەن بايلانىستى جايت.

"جىلدىڭ باسىندا ەسەپ-قيساپ جوسپارلانادى، سودان كەيىن تەندەرلىك راسىمدەر جۇرگىزىلەدى، سوندا جىل سوڭىنا قاراي بۇل اقشا يگەرىلە باستايدى. كوپتەگەن ينۆەستيسيالىق، ينفراقۇرىلىمدىق جوبالار، وكىنىشكە قاراي، ءالى دە يمپورتقا تاۋەلدى. ناتيجەسىندە، 4-توقساندا ءبىز ۆاليۋتاعا سۇرانىستىڭ ارتقانىن كورىپ وتىرمىز.بۇعان ۆاليۋتا بيرجاسىنداعى ساۋدا-ساتتىقتىڭ ناقتى كولەمى دالەل. ءقازىر ونىڭ كولەمى تاۋلىگىنە 290 ميلليوندى قۇرايدى، ال ورتاشا تاۋلىكتەگى دەڭگەيى 200 ميلليون شاماسىندا بولۋى ءتيىس، ياعني بيرجاداعى ساۋدا-ساتتىقتىڭ ورتاشا كولەمىنەن 30-40% - عا جوعارى"، - دەپ اتاپ ءوتتى سۇلەيمەنوۆ.

ايتا كەتسەك، بۇگىن، 2024 جىلى 30 قازاندا ءماجىلىس 2025-2027 جىلدارعا ارنالعان رەسپبۋليكالىق بيۋدجەتتى قابىلدادى.

تاقىرىپقا وراي: ۇلتتىق بانك ءتوراعاسىنىڭ مالىمدەمەسى ۇكىمەت مۇشەلەرىن سەلت ەتكىزدى