Ulttyq Bank óz qyzmeti aiasynda altyn óndirýshi otandyq kásiporyndardan altyn satyp alýda memleket quqyǵyn iske asyrady. Mundai operatsiialar aiasynda retteýshi organ dollar satatyn bolady. Osylai degen Ulttyq bank basshysy Timýr Súleimenov munyń infliatsiialyq qysymdy tómendetýge jáne makroekonomikalyq turaqtylyqty qoldaýǵa baǵyttalǵan shara ekenin atap ótti, dep jazady Dalanews.kz.
"Ózderińiz biletindei, Ulttyq Bank óz qyzmeti aiasynda altyn óndirýshi otandyq kásiporyndardan altyn satyp alýda memleket quqyǵyn iske asyrady. Bul shara halyqaralyq rezervterdi tolyqtyrýǵa jáne ekonomikanyń syrtqy naryqtaǵy ózgeristerge ushyramai damýyna baǵyttalǵan", – deidi Timýr Súleimenov.
Onyń aitýynsha, ustanǵan osy saiasat nátijeli bolyp, rezerv kólemin 45,8 mlrd dollarǵa deiin, onyń ishinde altyn kólemin 23,8 mlrd dollarǵa deiin ósirýge múmkindik týdy.
"Alaida mundai operatsiialar teńge emissiiasy esebinen qarjylandyrylady. Osy jaǵynan alǵanda, ol ekonomikadaǵy aqsha kólemin arttyryp, onyń taýarlyq massadan asyp túsýine jol beredi, bul óz kezeginde, árine, infliatsiiaǵa áser etpei qoimaidy. Osyndai áserlerdi azaitý úshin ótken jyly Ulttyq Bank altyn satyp alýdyń ornyna monetarlyq beitaraptylyq saiasatyna kóshý týrasynda talqy ótkizdi. Sol pikirtalastyń nátijesinde jáne júrgizilgen taldaý nátijesin eskerip, altyn satyp alýǵa bailanysty operatsiialardy teńgerý arqyly dollar satýǵa kirisemiz", degen Ulttyq bank basshysy bul operatsiialar valiýtalyq interventsiiaǵa jatpaitynyn naqtylady.
Operatsiialardyń negizgi mindeti – ekonomikadaǵy artyq aqshany qysqartý jáne infliatsiianyń nysanaly deńgeiin 5%-ke jetkizý.
"Osy sharalar ishki naryqta valiýtaǵa usynys qalyptastyryp, ishki valiýta naryǵynda balansty saqtaýǵa yqpal etedi", – deidi ol.
Onyń aitýynsha, osy maqsatta dollardy satý kelesi aptada bastalýy múmkin, al jyl boiynda shamamen 5,5-6 mlrd dollar satý josparlanýda.
Buǵan deiin Timýr Súleimenov dollar satyp almaitynyn aitqan edi. Onyń pikirinshe, qazaqstandyqtar dollarǵa degen psihologiialyq táýeldilikten arylýǵa tiis.
