ۇلتتىق بانك ءوز قىزمەتى اياسىندا التىن ءوندىرۋشى وتاندىق كاسىپورىنداردان التىن ساتىپ الۋدا مەملەكەت قۇقىعىن ىسكە اسىرادى. مۇنداي وپەراسيالار اياسىندا رەتتەۋشى ورگان دوللار ساتاتىن بولادى. وسىلاي دەگەن ۇلتتىق بانك باسشىسى تيمۋر سۇلەيمەنوۆ مۇنىڭ ينفلياسيالىق قىسىمدى تومەندەتۋگە جانە ماكروەكونوميكالىق تۇراقتىلىقتى قولداۋعا باعىتتالعان شارا ەكەنىن اتاپ ءوتتى، دەپ جازادى Dalanews.kz.

"وزدەرىڭىز بىلەتىندەي، ۇلتتىق بانك ءوز قىزمەتى اياسىندا التىن ءوندىرۋشى وتاندىق كاسىپورىنداردان التىن ساتىپ الۋدا مەملەكەت قۇقىعىن ىسكە اسىرادى. بۇل شارا حالىقارالىق رەزەرۆتەردى تولىقتىرۋعا جانە ەكونوميكانىڭ سىرتقى نارىقتاعى وزگەرىستەرگە ۇشىراماي دامۋىنا باعىتتالعان"، – دەيدى تيمۋر سۇلەيمەنوۆ.

ونىڭ ايتۋىنشا، ۇستانعان وسى ساياسات ناتيجەلى بولىپ، رەزەرۆ كولەمىن 45،8 ملرد دوللارعا دەيىن، ونىڭ ىشىندە التىن كولەمىن 23،8 ملرد دوللارعا دەيىن وسىرۋگە مۇمكىندىك تۋدى.  

"الايدا مۇنداي وپەراسيالار تەڭگە ەميسسياسى ەسەبىنەن قارجىلاندىرىلادى. وسى جاعىنان العاندا، ول ەكونوميكاداعى اقشا كولەمىن ارتتىرىپ، ونىڭ تاۋارلىق ماسسادان اسىپ تۇسۋىنە جول بەرەدى، بۇل ءوز كەزەگىندە، ارينە، ينفلياسياعا اسەر ەتپەي قويمايدى. وسىنداي اسەرلەردى ازايتۋ ءۇشىن وتكەن جىلى ۇلتتىق بانك التىن ساتىپ الۋدىڭ ورنىنا مونەتارلىق بەيتاراپتىلىق ساياساتىنا كوشۋ تۋراسىندا تالقى وتكىزدى. سول پىكىرتالاستىڭ ناتيجەسىندە جانە جۇرگىزىلگەن تالداۋ ناتيجەسىن ەسكەرىپ، التىن ساتىپ الۋعا بايلانىستى وپەراسيالاردى تەڭگەرۋ ارقىلى دوللار ساتۋعا كىرىسەمىز"، دەگەن ۇلتتىق بانك باسشىسى بۇل وپەراسيالار ۆاليۋتالىق ينتەرۆەنسياعا جاتپايتىنىن ناقتىلادى.

وپەراسيالاردىڭ نەگىزگى مىندەتى – ەكونوميكاداعى ارتىق اقشانى قىسقارتۋ جانە ينفلياسيانىڭ نىسانالى دەڭگەيىن 5%-كە جەتكىزۋ.

"وسى شارالار iشكi نارىقتا ۆاليۋتاعا ۇسىنىس قالىپتاستىرىپ، iشكi ۆاليۋتا نارىعىندا بالانستى ساقتاۋعا ىقپال ەتەدى"، – دەيدى ول.

ونىڭ ايتۋىنشا، وسى ماقساتتا دوللاردى ساتۋ كەلەسى اپتادا باستالۋى مۇمكىن، ال جىل بويىندا شامامەن 5،5-6 ملرد دوللار ساتۋ جوسپارلانۋدا.

بۇعان دەيىن تيمۋر سۇلەيمەنوۆ دوللار ساتىپ المايتىنىن ايتقان ەدى. ونىڭ پىكىرىنشە، قازاقستاندىقتار دوللارعا دەگەن پسيحولوگيالىق تاۋەلدىلىكتەن ارىلۋعا ءتيىس.