Almatyda qoǵam belsendileriniń qatysýymen LGBT nasihatyna qarsy baspasóz konferentsiiasy ótti,- dep habarlaidy Dalanews.kz
Almaty qalasynda azamattyq belsendiler men quqyq qorǵaýshylardyń qatysýymen «Ultqa balta shabar LGBT uiymdardyń nasihatyna jol joq!» atty baspasóz konferentsiiasy ótti. Sharanyń maqsaty - Qazaqstan Respýblikasy Parlamenti Májilisi depýtattary usynǵan dástúrli emes jynystyq qatynastardy nasihattaýǵa tyiym salý týraly zań jobasyn qoldaý jáne qoǵamdy aqparattandyrý.
Baspasóz jiynyn qoǵam belsendisi ári quqyq qorǵaýshy Baǵila Baltabaeva uiymdastyrdy. Onyń aitýynsha, bul bastamaǵa qazaqstandyqtardyń basym bóligi qoldaý bildirip otyr.
«2019 jyldan beri qarai birjynysty qarym-qatynasty qoldaýshylar óz belsendilikterin kúsheitip, túrli alańdarda jalaýlaryn kóterip júr. Bul bizdi beijai qaldyrmady. Men qoǵam belsendisi ári ana retinde mundai nasihatqa qarsy áreket etýge májbúr boldym. Jastardyń osyndai uiymdardyń jiyndarynda júrgenin kórip, únsiz qala almadym. Sol sebepti dástúrli emes qatynastardy nasihattaýǵa tolyq tyiym salý maqsatynda petitsiia jariialadyq. Nátijesinde 50 myńnan astam qol jinalyp, usynys Úkimetke jetkizildi. Qazir ol Senattyń qaraýynda. Memleket basshysy qol qoisa, zań tolyq kúshine enedi», – dedi Baǵila Baltabaeva.
Konferentsiiaǵa belgili qoǵam qairatkerleri men shyǵarmashyl tulǵalar qatysyp, óz pikirlerin bildirdi. Olardyń arasynda jazýshy, Qazaqstan Jazýshylar Odaǵynyń múshesi Marat Toqashbaev ta bar.
«Biz eń aldymen keleshek urpaq úshin alańdaimyz. Meniń 12-13 nemerem bar. Sol balalardyń ulttyq bolmysqa jat, arsyz dúnielerdiń yqpalyna túskenin qalamaimyn. Birjynysty uiymdar halyqtyń nebári 1 paiyzyn quraidy. Sol azshylyq úshin qalǵan 99 paiyz halyq zardap shekpeýge tiis», – dedi ol.
Belsendi, qoǵam qairatkeri Sholpan Bostanqyzy da zańnyń shyǵýyn qoldap, bul keleshek urpaq úshin mańyzdy túitkil ekenin basa aitty.
«LGBT ókilderi óz quqyqtary taptaldy dep jii málimdeme jasaidy. Biraq biz olardyń jeke ómirine aralasyp jatqan joqpyz. Biz tek olardyń ashyq túrde nasihat júrgizýine, keleshek urpaqtyń sanasyn ýlaýyna qarsymyz. Osyny durys túsingen jón», – dep atap ótti ol.
Jiyn barysynda qatysýshylar áleýmettik zertteýlerdiń nátijelerin de usyndy. Zertteýler qazaqstandyqtardyń basym bóligi dástúrli emes qatynastarǵa qarsy ekenin kórsetti. «Qazaqstandyq qoǵamdy damytý institýtynyń» dereginshe, respondentterdiń 90,5 paiyzy gomoseksýaldyq qatynastardy óz balalaryna qabyldaýǵa daiyn emes ekenin aitqan. Al halyqaralyq zertteýlerde mundai qatynastardyń «aqtalý deńgeii» nebári 2,2 ball bolǵan.
Baǵila Baltabaevanyń aitýynsha, zań jobasy sóz bostandyǵyna shekteý emes, qoǵam men jastardyń psihikalyq jáne rýhani densaýlyǵyn qorǵaýǵa baǵyttalǵan.
«Bul bastama ulttyń rýhani qaýipsizdigin qorǵaýǵa baǵyttalǵan. Maqsat – bireýdi qýdalaý emes, jastardyń sanasyn teris nasihattan saqtaý, – dedi ol jiyndy qorytyndylai kele.
Dástúrli emes jynystyq qatynastardy nasihattaýǵa tyiym salý týraly zań jobasy qazirgi tańda Senat qaraýynda. Zań qabyldanǵan jaǵdaida, ol «Bala quqyqtary týraly», «Jarnama týraly», «Mass-media týraly» jáne basqa da birqatar zańdarǵa engizilmek.
