Ulytaý oblysynyń bas ekology Dastan Tileýbekov, onyń eki orynbasary men eki kásipkerdi paraqorlyq deregi boiynsha sottady, dep habarlaidy Dalanews.kz.
Jezqazǵan qalalyq soty Dastan Tileýbekov, TÁ, TA jáne AS-qa qatysty sybailas jemqorlyq qylmysy boiynsha qylmystyq isti qarady (QR QK-niń 366-babynyń 3-bóliginiń 3)-tarmaǵy, 366-babynyń 3-bóliginiń 2,4)-tarmaqtary, 367-babynyń 2-bóligi).
Dastan Tileýbekov jáne orynbasary (T.Á) Ulytaý oblysynyń Ekologiia departamentiniń basshysy men onyń orynbasary qyzmetin atqara otyryp, aldyn ala sóz bailasyp, 2024 jylǵy qazan men jeltoqsan aralyǵynda aitarlyqtai mólsherde 5 250 000 teńge para alǵan.
Sonymen qatar, Dastan Tileýbekov jeke ózi 2024 jylǵy jeltoqsan men 2025 jylǵy qańtar aralyǵynda aitarlyqtai mólsherde 2 500 000 teńge para alǵan. Atalǵan somalar para berýshilerdiń múddesine zańsyz áreketter jasaý úshin alynǵan.
«R» JShS-niń direktory, kásipker (T.A) qorshaǵan orta sapasynyń maqsatty kórsetkishteriniń jobalaryn kelisý úshin Departament basshysy men onyń orynbasaryna aitarlyqtai mólsherde 1 750 000 teńge para bergen.
«E» JShS-niń direktory, taǵy bir kásipker (A.S) Sátbaev qalasy boiynsha shekti jol beriletin shyǵaryndylardyń jiyntyq tomynyń jobasyn kelisý úshin Departament basshysy men onyń orynbasaryna aitarlyqtai mólsherde 3 500 000 teńge para bergen.
M (qylmystyq qýdalaý toqtatylǵan) ekologiialyq ruqsat alý úshin Dastan Tileýbekovke aitarlyqtai mólsherde 2 500 000 teńge para bergen (3 epizod).
Is boiynsha jedeldetilgen tergep-tekserý júrgizildi. Sottalýshylar sotqa deiingi tergep-tekserý jáne sot tergeýi barysynda kinálaryn tolyq moiyndady, sonymen qatar olardyń kinási jinalǵan dáleldemelermen bekitildi.
Sot jaza taǵaiyndaý kezinde:
• Barlyq sottalýshylardyń kinásin tolyq moiyndaýyn jáne shyn nietpen ókinýlerin;
• Dastan Tileýbekov, onyń orynbasary jáne bir kásipkerdiń (TA-nyń) jas balalarynyń bolýyn – jeńildetetin mán-jailar retinde tanydy.
• Dastan Tileýbekov jáne orynbasarynyń kásibi antyn buzýyn – aýyrlatatyn mán-jai retinde tanydy.
• Eki kásipkerge qatysty aýyrlatatyn mán-jailar tanylǵan joq.
Sottalýshylar kinásin tolyq moiyndap, tómengi shekten tómen jaza taǵaiyndaýdy surady. Eki kásipkerdi aiyppul tóleý múmkindikteri bar ekenin málimdedi.
QK-niń 366 jáne 367-baptary bir laýazymdardy atqarý quqyǵynan aiyrýmen, aiyppul nemese bas bostandyǵynan aiyrý jazasyn kózdeidi.
Sot QK-niń 52-babynyń talaptaryn, onyń ishinde sottalýshylardyń jeke basyn, qylmystyq jaýaptylyq pen jazany jeńildetetin jáne aýyrlatatyn mán-jailardyń bolýyn eskerdi.
Sottyń sheshimi:
Jezqazǵan qalalyq sotynyń úkimimen:
• Dastan Tileýbekov jáne orynbasary – QK-niń 366-babynyń 3-bóliginiń 2,4) tarmaqtary boiynsha kináli dep tanylyp, 6 jylǵa bas bostandyǵynan aiyrý jazasy taǵaiyndaldy.
• Eki kásipker – QK-niń 367-babynyń 2-bóligi boiynsha kináli dep tanylyp, paranyń jiyrma ese kóleminde aiyppul tóleýge sottaldy:
• Birinshi kásipker (TA) – 35 000 000 teńge mólsherinde aiyppul
• Ekinshi kásipker (AS) – 70 000 000 teńge mólsherinde aiyppul.
Budan basqa, barlyq sottalǵandarǵa memlekettik qyzmette, sýdiada, jergilikti ózin-ózi basqarý organdarynda, Qazaqstan Respýblikasynyń Ulttyq Bankinde jáne onyń vedomstvolarynda, Qarjy naryǵy men qarjy uiymdaryn retteý, baqylaý jáne qadaǵalaý jónindegi ýákiletti organda, memlekettik uiymdarda jáne kvazimemlekettik sektor sýbektilerinde laýazymdardy atqarýǵa ómir boiy tyiym salý túrinde qosymsha jaza taǵaiyndaldy.
Úkim zańdy kúshine engen joq.
