Дастан Тілеубеков және орынбасары (Т.Ә) Ұлытау облысының Экология департаментінің басшысы мен оның орынбасары қызметін атқара отырып, алдын ала сөз байласып, 2024 жылғы қазан мен желтоқсан аралығында айтарлықтай мөлшерде 5 250 000 теңге пара алған.

 

Сонымен қатар, Дастан Тілеубеков жеке өзі 2024 жылғы желтоқсан мен 2025 жылғы қаңтар аралығында айтарлықтай мөлшерде 2 500 000 теңге пара алған. Аталған сомалар пара берушілердің мүддесіне заңсыз әрекеттер жасау үшін алынған.

 

«Р» ЖШС-нің директоры, кәсіпкер (Т.А) қоршаған орта сапасының мақсатты көрсеткіштерінің жобаларын келісу үшін Департамент басшысы мен оның орынбасарына айтарлықтай мөлшерде 1 750 000 теңге пара берген.

 

«Э» ЖШС-нің директоры, тағы бір кәсіпкер (А.С) Сәтбаев қаласы бойынша шекті жол берілетін шығарындылардың жиынтық томының жобасын келісу үшін Департамент басшысы мен оның орынбасарына айтарлықтай мөлшерде 3 500 000 теңге пара берген.

 

М (қылмыстық қудалау тоқтатылған) экологиялық рұқсат алу үшін Дастан Тілеубековке айтарлықтай мөлшерде 2 500 000 теңге пара берген (3 эпизод).

 

Іс бойынша жеделдетілген тергеп-тексеру жүргізілді. Сотталушылар сотқа дейінгі тергеп-тексеру және сот тергеуі барысында кінәларын толық мойындады, сонымен қатар олардың кінәсі жиналған дәлелдемелермен бекітілді.

 

Сот жаза тағайындау кезінде:

• Барлық сотталушылардың кінәсін толық мойындауын және шын ниетпен өкінулерін;

• Дастан Тілеубеков, оның орынбасары және бір кәсіпкердің (ТА-ның) жас балаларының болуын – жеңілдететін мән-жайлар ретінде таныды.

• Дастан Тілеубеков және орынбасарының кәсіби антын бұзуын – ауырлататын мән-жай ретінде таныды.

• Екі кәсіпкерге қатысты ауырлататын мән-жайлар танылған жоқ.

 

Сотталушылар кінәсін толық мойындап, төменгі шектен төмен жаза тағайындауды сұрады. Екі кәсіпкерді айыппұл төлеу мүмкіндіктері бар екенін мәлімдеді.

ҚК-нің 366 және 367-баптары бір лауазымдарды атқару құқығынан айырумен, айыппұл немесе бас бостандығынан айыру жазасын көздейді.

Сот ҚК-нің 52-бабының талаптарын, оның ішінде сотталушылардың жеке басын, қылмыстық жауаптылық пен жазаны жеңілдететін және ауырлататын мән-жайлардың болуын ескерді.

 

Соттың шешімі:

 

Жезқазған қалалық сотының үкімімен:

• Дастан Тілеубеков және орынбасары – ҚК-нің 366-бабының 3-бөлігінің 2,4) тармақтары бойынша кінәлі деп танылып, 6 жылға бас бостандығынан айыру жазасы тағайындалды.

• Екі кәсіпкер – ҚК-нің 367-бабының 2-бөлігі бойынша кінәлі деп танылып, параның жиырма есе көлемінде айыппұл төлеуге сотталды:

• Бірінші кәсіпкер (ТА) – 35 000 000 теңге мөлшерінде айыппұл

• Екінші кәсіпкер (АС) – 70 000 000 теңге мөлшерінде айыппұл.

 

Бұдан басқа, барлық сотталғандарға мемлекеттік қызметте, судьяда, жергілікті өзін-өзі басқару органдарында, Қазақстан Республикасының Ұлттық Банкінде және оның ведомстволарында, Қаржы нарығы мен қаржы ұйымдарын реттеу, бақылау және қадағалау жөніндегі уәкілетті органда, мемлекеттік ұйымдарда және квазимемлекеттік сектор субъектілерінде лауазымдарды атқаруға өмір бойы тыйым салу түрінде қосымша жаза тағайындалды.

 

Үкім заңды күшіне енген жоқ.