داستان تىلەۋبەكوۆ جانە ورىنباسارى (ت.ءا) ۇلىتاۋ وبلىسىنىڭ ەكولوگيا دەپارتامەنتىنىڭ باسشىسى مەن ونىڭ ورىنباسارى قىزمەتىن اتقارا وتىرىپ، الدىن الا ءسوز بايلاسىپ، 2024 جىلعى قازان مەن جەلتوقسان ارالىعىندا ايتارلىقتاي مولشەردە 5 250 000 تەڭگە پارا العان.

 

سونىمەن قاتار، داستان تىلەۋبەكوۆ جەكە ءوزى 2024 جىلعى جەلتوقسان مەن 2025 جىلعى قاڭتار ارالىعىندا ايتارلىقتاي مولشەردە 2 500 000 تەڭگە پارا العان. اتالعان سومالار پارا بەرۋشىلەردىڭ مۇددەسىنە زاڭسىز ارەكەتتەر جاساۋ ءۇشىن الىنعان.

 

«ر» ءجشس-نىڭ ديرەكتورى، كاسىپكەر (ت.ا) قورشاعان ورتا ساپاسىنىڭ ماقساتتى كورسەتكىشتەرىنىڭ جوبالارىن كەلىسۋ ءۇشىن دەپارتامەنت باسشىسى مەن ونىڭ ورىنباسارىنا ايتارلىقتاي مولشەردە 1 750 000 تەڭگە پارا بەرگەن.

 

«ە» ءجشس-نىڭ ديرەكتورى، تاعى ءبىر كاسىپكەر (ا.س) ساتبايەۆ قالاسى بويىنشا شەكتى جول بەرىلەتىن شىعارىندىلاردىڭ جيىنتىق تومىنىڭ جوباسىن كەلىسۋ ءۇشىن دەپارتامەنت باسشىسى مەن ونىڭ ورىنباسارىنا ايتارلىقتاي مولشەردە 3 500 000 تەڭگە پارا بەرگەن.

 

م (قىلمىستىق قۋدالاۋ توقتاتىلعان) ەكولوگيالىق رۇقسات الۋ ءۇشىن داستان تىلەۋبەكوۆكە ايتارلىقتاي مولشەردە 2 500 000 تەڭگە پارا بەرگەن (3 ەپيزود).

 

ءىس بويىنشا جەدەلدەتىلگەن تەرگەپ-تەكسەرۋ جۇرگىزىلدى. سوتتالۋشىلار سوتقا دەيىنگى تەرگەپ-تەكسەرۋ جانە سوت تەرگەۋى بارىسىندا كىنالارىن تولىق مويىندادى، سونىمەن قاتار ولاردىڭ كىناسى جينالعان دالەلدەمەلەرمەن بەكىتىلدى.

 

سوت جازا تاعايىنداۋ كەزىندە:

• بارلىق سوتتالۋشىلاردىڭ كىناسىن تولىق مويىنداۋىن جانە شىن نيەتپەن وكىنۋلەرىن؛

• داستان تىلەۋبەكوۆ، ونىڭ ورىنباسارى جانە ءبىر كاسىپكەردىڭ (تا-نىڭ) جاس بالالارىنىڭ بولۋىن – جەڭىلدەتەتىن ءمان-جايلار رەتىندە تانىدى.

• داستان تىلەۋبەكوۆ جانە ورىنباسارىنىڭ كاسىبي انتىن بۇزۋىن – اۋىرلاتاتىن ءمان-جاي رەتىندە تانىدى.

• ەكى كاسىپكەرگە قاتىستى اۋىرلاتاتىن ءمان-جايلار تانىلعان جوق.

 

سوتتالۋشىلار كىناسىن تولىق مويىنداپ، تومەنگى شەكتەن تومەن جازا تاعايىنداۋدى سۇرادى. ەكى كاسىپكەردى ايىپپۇل تولەۋ مۇمكىندىكتەرى بار ەكەنىن مالىمدەدى.

قك-نىڭ 366 جانە 367-باپتارى ءبىر لاۋازىمداردى اتقارۋ قۇقىعىنان ايىرۋمەن، ايىپپۇل نەمەسە باس بوستاندىعىنان ايىرۋ جازاسىن كوزدەيدى.

سوت قك-نىڭ 52-بابىنىڭ تالاپتارىن، ونىڭ ىشىندە سوتتالۋشىلاردىڭ جەكە باسىن، قىلمىستىق جاۋاپتىلىق پەن جازانى جەڭىلدەتەتىن جانە اۋىرلاتاتىن ءمان-جايلاردىڭ بولۋىن ەسكەردى.

 

سوتتىڭ شەشىمى:

 

جەزقازعان قالالىق سوتىنىڭ ۇكىمىمەن:

• داستان تىلەۋبەكوۆ جانە ورىنباسارى – قك-نىڭ 366-بابىنىڭ 3-بولىگىنىڭ 2،4) تارماقتارى بويىنشا كىنالى دەپ تانىلىپ، 6 جىلعا باس بوستاندىعىنان ايىرۋ جازاسى تاعايىندالدى.

• ەكى كاسىپكەر – قك-نىڭ 367-بابىنىڭ 2-بولىگى بويىنشا كىنالى دەپ تانىلىپ، پارانىڭ جيىرما ەسە كولەمىندە ايىپپۇل تولەۋگە سوتتالدى:

• ءبىرىنشى كاسىپكەر (تا) – 35 000 000 تەڭگە مولشەرىندە ايىپپۇل

• ەكىنشى كاسىپكەر (اس) – 70 000 000 تەڭگە مولشەرىندە ايىپپۇل.

 

بۇدان باسقا، بارلىق سوتتالعاندارعا مەملەكەتتىك قىزمەتتە، سۋديادا، جەرگىلىكتى ءوزىن-وزى باسقارۋ ورگاندارىندا، قازاقستان رەسپۋبليكاسىنىڭ ۇلتتىق بانكىندە جانە ونىڭ ۆەدومستۆولارىندا، قارجى نارىعى مەن قارجى ۇيىمدارىن رەتتەۋ، باقىلاۋ جانە قاداعالاۋ جونىندەگى ۋاكىلەتتى ورگاندا، مەملەكەتتىك ۇيىمداردا جانە كۆازيمەملەكەتتىك سەكتور سۋبەكتىلەرىندە لاۋازىمداردى اتقارۋعا ءومىر بويى تىيىم سالۋ تۇرىندە قوسىمشا جازا تاعايىندالدى.

 

ۇكىم زاڭدى كۇشىنە ەنگەن جوق.