Politsiia 16 jastaǵy Sherzat Bolat pen kúdiktilerdiń arasynda janjal týyndaǵan “Qamajai” dúkeninen video jariialady. Vedomstva bul arqyly tergeýdiń zańǵa sáikes júrgizilip jatqanyn jetkizgisi keldi. Marqumnyń otbasyna kómek qolyn sozyp júrgen quqyq qorǵaýshy Aitbek Amangeldi de sońǵy jaǵdailarǵa bailanysty pikir bildirip, memlekettik organdardyń kez kelgen aqparatqa túsinikteme berýi mańyzdy ekenin aitty, dep habarlaidy Dalanews.kz.
Onyń sózinshe, boljamdy aqparattardan qoǵamda qate túsinikter qalyptasýy múmkin.
“Sherzattyń isi úlken rezonans týdyrdy. Dúiim jurt Qarjaýbai men Gúlbardyń qaiǵysyna ortaqtasyp, ádil sheshim kútip otyr. Osyǵan orai, IIM qazirgi ýaqytta qoldarynda bar aqparatty usyndy. Biraq videoda qaqtyǵystyń bastalýy ǵana kórsetilgen. Sondyqtan material oqiǵany tolyq sipattamaidy jáne kúdiktilerdi aqtaýǵa esh negiz joq. Qoǵam Sherzattyń sebepsiz ári jazyqsyz ajal qushqanyn bilip otyr. Bul - kúdiktilerdiń sanaly ári salqynqandylyqpen jasaǵan áreketi”, – dedi quqyq qorǵaýshy Baigenews.kz agenttigine bergen suqbatynda.
Aitbek Amangeldi alǵashqy kúnnen bastap Sherzattyń otbasyna belsendi túrde kómektesip keledi. Ol marqumnyń ata-anasyna tegin zań kómegin usynyp, iske birden úsh advokat pen quqyq qorǵaýshy qosyldy. Qazir Amangeldi úilestirý jumystarymen, BAQ jáne áleýmettik jelilermen jumys istep, advokattarǵa qoldaý kórsetip jatyr.
“Qazirgi ýaqytta zardap shekkenderge kómek kórsetý jelimiz arqyly marqumnyń otbasyna psihologiialyq qoldaý da usynyldy. Mende zańdy ókil mártebesi bolmaǵandyqtan, tergeýge qatysa almaimyn, biraq qalǵan barlyq máseleni sheshýge kómektese alamyn”, – dedi ol.
Amangeldi marqumnyń otbasyna bir ret qoqan-loqy jasalǵanyn aitty.
“Biz iske aralasqan sátten bastap Sherzattyń ákesine bir ret tikelei qoqan-loqy jasalǵan. Beitanys adamdar Qarjaýbaiǵa advokat kómekteskisi keledi degen jeleýmen telefon tutqasyn alýyn ótingen. Telefon arqyly Karjaýbaiǵa: "Eger tynysh júrmeseń, ulyńnyń qasynan kórińdi daiyndap qoi’, – degen”, – dedi ol.
Aitbek Amangeldi tergeý organdary bul faktini tekserip jatqanyn qosty.
Quqyq qorǵaýshy jasóspirimdi óltirgen kúdiktilerge qatysty da pikir bildirdi.
“Asa qatigezdikpen jasalǵan kisi óltirý” baby boiynsha 20 jyldan ómir boiyna deiin bas bostandyǵynan aiyrý jazasy qarastyrylǵan.Bir top adam ulyn ata-anasynyń kóz aldynda qatygezdikpen óltirgenin eskersek, olar ómir boiyna bas bostandyǵynan aiyrylýy tiis.
Qazaqstanda ómir boiyna bas bostandyǵynan aiyrý jazasyna qol jetkizý qiyn. Biraq biz báribir kisi óltirýshilerge ómir boiyna jaza berýdi talap etemiz jáne Qazaqstandaǵy ómirdiń mańyzyn túsindirýge tyrysamyz. Bul, menińshe, durys baǵyt. Óitkeni ómirden, ásirese bala ómirinen qymbat eshteńe joq. Sherzat ta sondai bala edi”, – dedi Aitbek Amangeldi Baigenews.kz agenttigine.
Eske salaiyq, buǵan deiin marqum Saltanattyń aǵasy, quqyq qorǵaýshy Aitbek Amangeldi bir top buzaqynyń qolynan qaza tapqan Sherzattyń isine zańgerler toby bilek sybana iske kiriskenin habarlaǵan edi.
“Sońǵy eki kúnde jábirlenýshilermen jumys istep, qolda bar aqparattardy zerttep shyqtyq. Men zańger emespin. Sol sebepti tergeýge qatysa almaimyn jáne materialdarǵa da qol jetkizý múmkindigim joq. Bul ispen zańgerler ainalysady. Meniń basty mindetim otbasy múddesin qorǵaýǵa baǵyttalǵan. Bunyń tergeýge esh qatysy joq. Sondyqtan isti Astanada júrip-aq, oryndai alamyn.
Qazirgi tańda zańgerler toby tolyq iske kiristi jáne óz mindetterin jaqsy atqaryp jatyr. Eger qosymsha kómek qajet bolsa, alǵashqy kúnnen bailanysqa shyqqan zańgerlerimizdi shaqyra alamyz”, - dedi Aitbek Amangeldi.
