پوليسيا 16 جاستاعى شەرزات بولات پەن كۇدىكتىلەردىڭ اراسىندا جانجال تۋىنداعان “قاماجاي” دۇكەنىنەن ۆيدەو جاريالادى. ۆەدومستۆا بۇل ارقىلى تەرگەۋدىڭ زاڭعا سايكەس جۇرگىزىلىپ جاتقانىن جەتكىزگىسى كەلدى. مارقۇمنىڭ وتباسىنا كومەك قولىن سوزىپ جۇرگەن قۇقىق قورعاۋشى ايتبەك امانگەلدى دە سوڭعى جاعدايلارعا بايلانىستى پىكىر ءبىلدىرىپ، مەملەكەتتىك ورگانداردىڭ كەز كەلگەن اقپاراتقا تۇسىنىكتەمە بەرۋى ماڭىزدى ەكەنىن ايتتى، دەپ حابارلايدى Dalanews.kz.

ونىڭ سوزىنشە، بولجامدى اقپاراتتاردان قوعامدا قاتە تۇسىنىكتەر قالىپتاسۋى مۇمكىن.

“شەرزاتتىڭ ءىسى ۇلكەن رەزونانس تۋدىردى. ءدۇيىم جۇرت قارجاۋباي مەن گۇلباردىڭ قايعىسىنا ورتاقتاسىپ، ءادىل شەشىم كۇتىپ وتىر. وسىعان وراي، ءىىم قازىرگى ۋاقىتتا قولدارىندا بار اقپاراتتى ۇسىندى. ءبىراق ۆيدەودا قاقتىعىستىڭ باستالۋى عانا كورسەتىلگەن. سوندىقتان ماتەريال وقيعانى تولىق سيپاتتامايدى جانە كۇدىكتىلەردى اقتاۋعا ەش نەگىز جوق. قوعام شەرزاتتىڭ سەبەپسىز ءارى جازىقسىز اجال قۇشقانىن ءبىلىپ وتىر. بۇل - كۇدىكتىلەردىڭ سانالى ءارى سالقىنقاندىلىقپەن جاساعان ارەكەتى”، – دەدى قۇقىق قورعاۋشى Baigenews.kz اگەنتتىگىنە بەرگەن سۇقباتىندا.

ايتبەك امانگەلدى العاشقى كۇننەن باستاپ شەرزاتتىڭ وتباسىنا بەلسەندى تۇردە كومەكتەسىپ كەلەدى. ول مارقۇمنىڭ اتا-اناسىنا تەگىن زاڭ كومەگىن ۇسىنىپ، ىسكە بىردەن ءۇش ادۆوكات پەن قۇقىق قورعاۋشى قوسىلدى. ءقازىر امانگەلدى ۇيلەستىرۋ جۇمىستارىمەن، ب ا ق جانە الەۋمەتتىك جەلىلەرمەن جۇمىس ىستەپ، ادۆوكاتتارعا قولداۋ كورسەتىپ جاتىر.

“قازىرگى ۋاقىتتا زارداپ شەككەندەرگە كومەك كورسەتۋ جەلىمىز ارقىلى مارقۇمنىڭ وتباسىنا پسيحولوگيالىق قولداۋ دا ۇسىنىلدى. مەندە زاڭدى وكىل مارتەبەسى بولماعاندىقتان، تەرگەۋگە قاتىسا المايمىن، ءبىراق قالعان بارلىق ماسەلەنى شەشۋگە كومەكتەسە الامىن”، – دەدى ول.

امانگەلدى مارقۇمنىڭ وتباسىنا ءبىر رەت قوقان-لوقى جاسالعانىن ايتتى.

“ءبىز ىسكە ارالاسقان ساتتەن باستاپ شەرزاتتىڭ اكەسىنە ءبىر رەت تىكەلەي قوقان-لوقى جاسالعان. بەيتانىس ادامدار قارجاۋبايعا ادۆوكات كومەكتەسكىسى كەلەدى دەگەن جەلەۋمەن تەلەفون تۇتقاسىن الۋىن وتىنگەن. تەلەفون ارقىلى كارجاۋبايعا: "ەگەر تىنىش جۇرمەسەڭ، ۇلىڭنىڭ قاسىنان كورىڭدى دايىنداپ قوي’، – دەگەن”، – دەدى ول.

ايتبەك امانگەلدى تەرگەۋ ورگاندارى بۇل فاكتىنى تەكسەرىپ جاتقانىن قوستى.

قۇقىق قورعاۋشى ءجاسوسپىرىمدى ولتىرگەن كۇدىكتىلەرگە قاتىستى دا پىكىر ءبىلدىردى.

“⁠اسا قاتىگەزدىكپەن جاسالعان كىسى ءولتىرۋ” بابى بويىنشا 20 جىلدان ءومىر بويىنا دەيىن باس بوستاندىعىنان ايىرۋ جازاسى قاراستىرىلعان.ءبىر توپ ادام ۇلىن اتا-اناسىنىڭ كوز الدىندا قاتىگەزدىكپەن ولتىرگەنىن ەسكەرسەك، ولار ءومىر بويىنا باس بوستاندىعىنان ايىرىلۋى ءتيىس.

قازاقستاندا ءومىر بويىنا باس بوستاندىعىنان ايىرۋ جازاسىنا قول جەتكىزۋ قيىن. ءبىراق ءبىز ءبارىبىر كىسى ولتىرۋشىلەرگە ءومىر بويىنا جازا بەرۋدى تالاپ ەتەمىز جانە قازاقستانداعى ءومىردىڭ ماڭىزىن تۇسىندىرۋگە تىرىسامىز. بۇل، مەنىڭشە، دۇرىس باعىت. ويتكەنى ومىردەن، اسىرەسە بالا ومىرىنەن قىمبات ەشتەڭە جوق. شەرزات تا سونداي بالا ەدى”، – دەدى ايتبەك امانگەلدى Baigenews.kz اگەنتتىگىنە.

ەسكە سالايىق، بۇعان دەيىن مارقۇم سالتاناتتىڭ اعاسى، قۇقىق قورعاۋشى ايتبەك امانگەلدى ءبىر توپ بۇزاقىنىڭ قولىنان قازا تاپقان شەرزاتتىڭ ىسىنە زاڭگەرلەر توبى بىلەك سىبانا ىسكە كىرىسكەنىن حابارلاعان ەدى.

“سوڭعى ەكى كۇندە جابىرلەنۋشىلەرمەن جۇمىس ىستەپ، قولدا بار اقپاراتتاردى زەرتتەپ شىقتىق. مەن زاڭگەر ەمەسپىن. سول سەبەپتى تەرگەۋگە قاتىسا المايمىن جانە ماتەريالدارعا دا قول جەتكىزۋ مۇمكىندىگىم جوق.  بۇل ىسپەن زاڭگەرلەر اينالىسادى. مەنىڭ باستى مىندەتىم وتباسى مۇددەسىن قورعاۋعا باعىتتالعان. بۇنىڭ تەرگەۋگە ەش قاتىسى جوق. سوندىقتان ءىستى استانادا ءجۇرىپ-اق، ورىنداي الامىن.

قازىرگى تاڭدا زاڭگەرلەر توبى تولىق ىسكە كىرىستى جانە ءوز مىندەتتەرىن جاقسى اتقارىپ جاتىر. ەگەر قوسىمشا كومەك قاجەت بولسا، العاشقى كۇننەن بايلانىسقا شىققان زاڭگەرلەرىمىزدى شاقىرا الامىز”، - دەدى ايتبەك امانگەلدى.