Ulan aýdanyndaǵy qus etin óndiretin kásiporyn óndiristik qýatyn keńeitpekshi
Ulan aýdany ákimi Renat Qurmambaev qus eti óndirisin ulǵaitý maqsatynda jylyna 60 myń tonna et óndiretin kásiporynyń qurylys bastalǵanyn aitqan bolatyn. Quny 21 mlrd teńgeni quraityn joba «Biznestiń jol kartasy – 2025» baǵdarlamasy sheńberinde júzege asyp jatqanyn aita ketýimiz kerek. Ótken jyly jobaǵa qatysty alǵashqy jumystar qolǵa alynǵan bolatyn.
– Óskemen qus fabrikasy 45 jyldan beri bizdiń aýdannyń aýmaǵynda tabysty jumys istep keledi. Kásiporyn broiler óndirisin keńeitip qus etin óndirýdi jylyna 29 myń tonnaǵa deiin ulǵaitýdy kózdep otyr. Aldaǵy ýaqytta qus fabrikasy balapan shyǵarýdan bastap et ónimderin daiyndaýǵa deiingi óndiristik tizbekti iske qosatyn bolady. Kásiporyn qurylysy 2022 jyly tolyqtai aiaqtalady, – dedi aýdan ákimi.
Ákimniń aitýynsha aldaǵy jyldyń naýryz aiynan bastap qus fabrikasy arnaiy inkýbatorlarda jumyrtqa bastyrý isine kirispekshi. Al sáýirde alǵashqy balapandardy alýdy kózdep otyr. Kásiporyn 2023 jyly óziniń óndiristik qýatyna shyǵyp, jyl saiyn 60 myń tonna qus etin óndiredi der josparlanýda. Qazirdiń ózinde kásiporynda 600 adam jumys isteýde. Qus fabrikasynyń qurylysy tolyqtai aiaqtalǵanda taǵy 700 adam jumysqa qabyldanatyn bolady.
Ulan aýdanyndaǵy ekinshi iri joba «Agrokompleks Donskoe» seriktestiginiń jylyjai kesheni. Bir jarym gektar aýmaqty alatyn jylyjaidy salýǵa 1,3 mlrd teńge qarastyrylǵan. 2023 jyly jylyjai kesheniniń jumysy aiaqtalǵanda 50 adamaǵa turaqty jumys oryny paida bolady.
