Jánibek Áliken jetekshilik etetin «Ulaǵatty urpaq» qory Raıymbek aýdandyq ortalyq aýrýhanadaǵy syrqat jandarǵa eń kerekti, qajetti dári-dármekterdi alyp berdi. Olar eń birinshi kezekte 1 danasy 170 myń teńge turatyn 25 dana «Ottegi konsentratoryn» satyp alyp berýdi josparlap otyr.
Búgingi tańda atalǵan apparattyń 5 danasy men naýqastarǵa qajetti dári-dármekti aýrýhana ákimshiligi qabyldap aldy. Qalǵan apparattar da aptanyń aıaǵyna deıin jetkizilmek.
Osynyń aldynda ǵana «Ulaǵatty urpaq» ujymy jalpy baǵasy 700 myń teńge turatyn «Púlsoksımetr» jabdyǵynyń 20 danasyn aýrýhanaǵa tabystaǵan bolatyn.
Qazirgi tańda jalpy baǵasy 346 500 teńge turatyn «Kanúlı» atty tynys alý tútikshesiniń 600 danasyna tapsyrys berildi. Ol tútiksheler de jýyq arada aýrýhanaǵa jetkizilip, syrqat jandardyń ıgiligine beriledi. Mundaı ıgilikti isten aýdan turǵyndarynan qurylǵan «Aıdyń nury», «Qareket», «Narynqol jastary» atty eriktiler toby da syrt qalyp otyrǵan joq.
– Dál qazirgideı ýaqytta «Ulaǵatty urpaq» sıaqty eriktiler tobynyń, qoǵamdyq qorlardyń jasap otyrǵan qoldaýy men kómegi aýdan turǵyndarynyń rızashylyǵyn týdyryp otyr. Ásirese, aýdandyq aýrýhanada jatqan syrqat jandardyń alǵystary sheksiz. Óńirge der kezinde jetkizilgen ókpeni jasandy jolmen tynys aldyratyn apparattardyń, eń qajetti dári-dármekterdiń arqasynda kóp adamdar syrqatynan aıyǵyp, qatarǵa qosyldy. Aýdannan shyqqan azamattardyń qoldaýymen jetkizilgen dári-dármekter búginde jetkilikti dárejede. Biz olarǵa aýdan turǵyndarynyń atynan zor alǵys aıtamyz, – deıdi Raıymbek aýdanynyń ákimi Nurjan Qudaıbergenov.
