جانىبەك الىكەن جەتەكشىلىك ەتەتىن «ۇلاعاتتى ۇرپاق» قورى رايىمبەك اۋداندىق ورتالىق اۋرۋحاناداعى سىرقات جاندارعا ەڭ كەرەكتى، قاجەتتى دارى-دارمەكتەردى الىپ بەردى. ولار ەڭ ءبىرىنشى كەزەكتە 1 داناسى 170 مىڭ تەڭگە تۇراتىن 25 دانا «وتتەگى كونسەنتراتورىن» ساتىپ الىپ بەرۋدى جوسپارلاپ وتىر.
بۇگىنگى تاڭدا اتالعان اپپاراتتىڭ 5 داناسى مەن ناۋقاستارعا قاجەتتى دارى-دارمەكتى اۋرۋحانا اكىمشىلىگى قابىلداپ الدى. قالعان اپپاراتتار دا اپتانىڭ اياعىنا دەيىن جەتكىزىلمەك.
وسىنىڭ الدىندا عانا «ۇلاعاتتى ۇرپاق» ۇجىمى جالپى باعاسى 700 مىڭ تەڭگە تۇراتىن «پۋلسوكسيمەتر» جابدىعىنىڭ 20 داناسىن اۋرۋحاناعا تابىستاعان بولاتىن.
قازىرگى تاڭدا جالپى باعاسى 346 500 تەڭگە تۇراتىن «كانيۋلي» اتتى تىنىس الۋ تۇتىكشەسىنىڭ 600 داناسىنا تاپسىرىس بەرىلدى. ول تۇتىكشەلەر دە جۋىق ارادا اۋرۋحاناعا جەتكىزىلىپ، سىرقات جانداردىڭ يگىلىگىنە بەرىلەدى. مۇنداي يگىلىكتى ىستەن اۋدان تۇرعىندارىنان قۇرىلعان «ايدىڭ نۇرى»، «قارەكەت»، «نارىنقول جاستارى» اتتى ەرىكتىلەر توبى دا سىرت قالىپ وتىرعان جوق.
– ءدال قازىرگىدەي ۋاقىتتا «ۇلاعاتتى ۇرپاق» سياقتى ەرىكتىلەر توبىنىڭ، قوعامدىق قورلاردىڭ جاساپ وتىرعان قولداۋى مەن كومەگى اۋدان تۇرعىندارىنىڭ ريزاشىلىعىن تۋدىرىپ وتىر. اسىرەسە، اۋداندىق اۋرۋحانادا جاتقان سىرقات جانداردىڭ العىستارى شەكسىز. وڭىرگە دەر كەزىندە جەتكىزىلگەن وكپەنى جاساندى جولمەن تىنىس الدىراتىن اپپاراتتاردىڭ، ەڭ قاجەتتى دارى-دارمەكتەردىڭ ارقاسىندا كوپ ادامدار سىرقاتىنان ايىعىپ، قاتارعا قوسىلدى. اۋداننان شىققان ازاماتتاردىڭ قولداۋىمەن جەتكىزىلگەن دارى-دارمەكتەر بۇگىندە جەتكىلىكتى دارەجەدە. ءبىز ولارعا اۋدان تۇرعىندارىنىڭ اتىنان زور العىس ايتامىز، – دەيدى رايىمبەك اۋدانىنىڭ اكىمى نۇرجان قۇدايبەرگەنوۆ.
