Úkimet halyqtyń baspana úshin bankten alǵan nesiesiniń 7 paiyzyn tóleidi
Qazir elimizde kóp bank ońailyqpen ipoteka bere qoimaityny belgili. Nesiesiniń ústi-ústine ústeme qosyp, 20 paiyzdan asyrady. Qysqasy, halyq esebinen qyrýar paidaǵa kenelýde. Endi kisi esiginde kúneltip júrgenderdi Úkimet jarylqaǵaly jatyr. Úmit kútip otyrǵan «Nurly jer» baǵdarlamasy shyn máninde iske asar bolsa, ipoteka arzandamaq.
– Baǵdarlamanyń birneshe negizgi baǵyttary bar. Eń áýeli ipotekalyq nesieniń paiyzy tómendeidi. Turǵyn úi qurylys jinaq bankiniń salymshylary men ákimdikte úi kezeginde turǵandar úshin úi qurylysynyń kólemin arttyramyz, – deidi QR Ulttyq ekonomika ministri Qýandyq Bishimbaev.
Maqtaýy asyrylǵan is eń áýeli jurtqa paiyzy tómen arzan ipoteka alýǵa múmkindik beredi. Iaǵni, jyldyq syiaqy mólsherlemesi 17 paiyzǵa deiingi ipotekany endi 10 paiyzben alýǵa bolady. Óitkeni, qalǵan 7 paiyzyn memleket biýdjetten sýbsidiia bólip, bankterge ózi tóleidi.
– Ekinshi deńgeili bankter Astana men Almaty turǵyndary úshin 20 million, al basqa óńirler úshin 15 million teńgege deiin ipoteka beretin bolady. Nesieni tóleý merzimi 15 jylǵa deiin, – dedi ministr.
Memlekettiń sýbsidiiasyna kez kelgen turǵyn ótinish berse bolady. Alaida, talap boiynsha, alatyn páterdiń alǵashqy jarnasy mindetti túrde bolýy tiis. Onyń kólemin banktiń ózi anyqtaidy. Biraq, turǵyn úi naryǵyndaǵy alpaýyt kompaniialar jurt jappai arzan ipoteka ala almaitynyn alǵa tartýda. Óitkeni, nesieniń bir bóligin tóleýge Úkimet kómekteskenimen, ekinshi deńgeili bankter adamdarǵa qyrýar aqshany uzaq jylǵa senip tapsyryp, táýekelge barmaidy.
Buǵan qatysty Qurylysshylar qaýymdastyǵynyń tóraǵasy Aidyn Rahymbaev:
– Onyń ústine ekinshi deńgeili bankterde ondai kóp aqsha joq. Sondyqtan baǵdarlama aiasynda jeńildikter qarastyrylǵanymen, ony úisizderdiń barlyǵy paidalanyp qala almaidy. Degenmen, turǵyn úi naryǵyna jańa qarqyn bereri sózsiz. Biraq, munymen másele sheshilmeidi, – dep óz oiyn ortaǵa saldy. Dese de, baǵdarlamany iske asyrýdy qolǵa alǵan Ulttyq ekonomika ministriniń baiandamasy optimizmge toly. Aitýynsha, «Nurly jer» boiynsha aldaǵy 15 jylda 250 myńǵa jýyq baspana salynbaqshy. Ol úshin biýdjetten 2 trillion teńgege jýyq qyrýar qarjy bólinedi.
Baspana salýǵa bólinetin qarjy artpasa kemimeidi. Iaǵni, sońǵy kezderi qarqyndy ósip kele jatqan munai baǵasy biýdjetke túsimdi arttyryp otyr. Eger keler jyly da, qara altyn baǵasy sharyqtaityn bolsa, «Nurly jerge» bólinetin aqsha qaita qaralyp, baǵdarlamaǵa ózgerister enýi múmkin.
Derekkózi: ktk.kz
