Prezident Toqaev Úkimettiń keńeitilgen otyrysyna qatysyp, el ekonomikasynyń ahýaly men aldaǵy mindetterge bailanysty mańyzdy málimdeme jasaýda dep habarlaidy Dalanews.kz.
Kezdesýge Premer-ministr Oljas Bektenov, Ulttyq bank tóraǵasy, sondai-aq birneshe oblys pen iri qalalardyń ákimderi kelip, 2024 jyldyń qorytyndysy boiynsha esep beredi.
Otyrystyń basynda Memleket basshysy áýeli álemdik jaǵdaidyń kúrt ózgerip jatqanyn atap ótti. Onyń aitýynsha, “jańa tehnologiialyq dáýir adamzattyń ómir súrý daǵdysyn túbegeili ózgertýde”, sondyqtan Qazaqstan da “jańa ahýalǵa saqadai sai bolýǵa” mindetti.
“Biz Úkimet pen ákimderdiń jumysyn, eń aldymen, ekonomikanyń damý kórsetkishteri men azamattardyń ál-aýqatyna qarap baǵalaimyz. Osy jumystyń nátijesi byltyr qandai boldy? Negizgi mindetter oryndaldy ma? Byltyr atqarylǵan ister, negizgi mindetter men onyń oryndalý deńgeii búgingi jiynnyń basty taqyryby bolmaq”, – dedi Prezident.
Premer-ministr Oljas Bektenovtiń aitýynsha, 2024 jylǵy jalpy ekonomikalyq ósim 4,8 paiyzdy quraǵan. Birqatar salada ilgerileý baiqalǵan, ásirese, aýyl sharýashylyǵy 13% ósimmen erekshelengen. Eldiń túrli óńirleri arasynda eń joǵary kórsetkish Soltústik Qazaqstan, Qaraǵandy, Túrkistan oblystary men Astana jáne Shymkent qalalaryna tiesili.
Premer-ministr munai óndirisiniń 2,4 mln tonnaǵa deiingi qysqarýy jalpy ishki ónimniń ósýine teris yqpal etkenin moiyndaýda.
Bektenov muny “iri ken oryndaryndaǵy jóndeý jumystary men OPEC+ kelisiminiń shekteýlerine” bailanysty dep túsindirdi. Ekonomikasy álsiz aimaqtar retinde Ulytaý, Atyraý, Batys Qazaqstan men Jambyl oblysy aityldy.
Prezident Toqaev Premer-ministrdiń baiandamasyn tyńdaǵannan keiin Úkimettiń aldaǵy maqsat-mindetterine toqtaldy.
Tsifrlandyrý dáýirine beiimdelý, innovatsiialyq tehnologiialardy engizý jáne óndiris tiimdiligin arttyrý – “memlekettiń básekege qabiletin nyǵaityp, turaqty damýyna jol ashatyn basty faktorlar” ekeni basa aityldy.
Sonymen qatar aldaǵy kezeńde jastardy jumyspen qamtý, óńirlerdegi infraqurylym jobalaryn jandandyrý, áleýmettik qoldaý tetikterin jetildirý jáne salyqtyq-biýdjettik saiasatty ońtailandyrý máseleleri nazarda bolmaq.
Keńeitilgen jiyn sońynda vitse-premer Serik Jumanǵarin, energetika ministri Almasadam Sátqaliev pen qarjy ministri Mádi Tákiev baspasóz ókilderine arnaiy brifing ótkizedi dep josparlanýda. Jýrnalister munai óndirisindegi ózgerister, biýdjettiń kiris-shyǵys balansy jáne keler jylǵa arnalǵan ekonomikalyq strategiia týraly naqty málimetterdi osy baspasóz máslihatynan kútedi.
